Gipuzkoako Transfusio eta Giza Ehunen Euskal Zentroko langileek ez dute beste aterabiderik ikusi, beren eskubideak aldarrikatzeko, grebara jotzea baino. Ahalegin handia egin dute elkarrizketaren eta negoziazioaren bidez irtenbideak bilatzeko, eta pazientzia handia erakutsi dute. Hala ere, enpresaren aldetik ez dago benetako borondaterik langileen aldarrikapenei erantzuteko. Langileak dira, ez boluntarioak.
Lehenik, enpresa-hitzarmena 2013tik berritu gabe dago. Oraindik ez da bilerarik egin hitzarmena negoziatzeko, nahiz eta hilabeteak igaro diren plataforma aurkeztu zenetik. Duela urtebete enpresarekin adostutako akordioa, negoziazioari hasiera emateko datak zehazten zituena, ez da bete. Egoera honen aurrean, langileak nazkatuta eta kezkatuta daude, eta ezinbestekotzat jotzen dute ahalik eta lasterren negoziazio-mahaia eratzea eta hitzarmen berria lortzeko lanean hastea.
Bigarrenik, garapen profesionalaren deialdiaren auzia dago. Gaur egun, hainbat langileri eragiten dien epaia dago, eta apirilean argitaratu zen arren, oraindik ez da bere osotasunean bete. Langileen eskubidea izanik eta ebazpen judiziala tartean egonda, ulertezina da egoera honek bere horretan jarraitzea. Gainera, badira epai horretatik kanpo geratzen diren beste langile batzuk ere; beraz, enpresak hartutako konpromisoa bete behar du, eta ondorioz, beharrezkoa da garapen profesionalaren deialdia langile guztiei aplikatzea eta osorik gauzatzea. Horretarako, zentzuzkotzat jotzen da hitzarmenaren negoziazioa baliatzea.
Horrenbestez, enpresari eta Osakidetzari arduraz jokatzeko eskatzen diete: enpresa-hitzarmenaren negoziazioa lehenbailehen has dadila, eta garapen profesionalaren deialdia osorik eta langile guztientzat gauza dadila.
Langileek hitzarmena eta garapen profesionala eskatzen dituzte, “orain eta langile guztientzat”.