Azaroaren 24an, Arrigorriagako udalbatzarrak ateak itxi zizkion klausula sozialen aplikazioari. EAJk eta PSEk bozkak batu zituzten EH Bilduk aurkeztatutako mozioaren kontra, eta ez zen onartu, Arrigorriaga Gara-ren babesa izan arren. Mozio horrek LABen aldarrikapen nagusiak jasotzen zituen, baita gehiengo sindikalarenak eta eragile sozialenak ere; beraz, EAJren eta PSOEren jarrerak kontratazio publikoekiko duten borondate politiko eskasa erakusten du.

Lan eta zerbitzuen azpikontratazioa Euskal Herriko instituzioak gobernatu dituzten alderdien erabakia izan da; bereziki EAJ, PSE eta UPN-rena. Langileontzat ondorio larriak ekarri ditu erabaki politiko horrek. Azpikontratazioen bidez, lan baldintzek txarrera egin dute orokorrean, eta, gainera, krisiaren ondorioz, enplegua suntsitu eta lanpostuak galdu dira azpikontratazioetan.

LABek argi dauka herritarrei eskaintzen zaizkien zerbitzuak langile publikoek eskaini behar dituztela. Gure helburua horixe izan arren, jakitun gara asko direla azpikontratatzen diren zerbitzuak, eta, beraz, azpikontratazioa burutzeko bideak arautu eta prekarietatea ezabatu behar dugu.

Gauzak horrela, administrazio publikoaren kontratazio irizpideetan klausula sozialak sartzearen aldeko apustu garbia egin nahi dugu. Klausula sozial hauen bidez, kalitateko enplegua sortu nahi dugu, gizon eta emakumeen arteko berdintasuna bultzatu, hizkuntza eskubideak bermatu, ingurumena babesteko irizpideak sartu eta oinarrizko eskubide sozialak bermatu nahi ditugu. Hau guztia derrigorrez bete beharreko arau batek jasotzea nahi dugu.

LABen proposamenak, mozioan jasotan zeudenak, legezkoak dira eta ezartzea alderdi politikoen esku dago; baina, dirudienez, Arrigorriagako gobernuko taldeek, EAJ eta PSE alderdiek, ez dute honetarako borondaterik.