Azken egunotan, eta koronabirusagatik dekretatutako osasun-larrialdiko egoeraren aurrean, Lakuako gobernutik, beste langileei bezala, sukaldari eta garbitzaileen kolektiboari eragiten dizkioten erabakiak hartzen ari dira.
Horien artean, euskara ikasteko liberatutako langileei (irakasle funtzionario zein lan-kontratudunei, hezitzaileei, zerbitzuetako langileei, administrazio orokorrekoei…) zuzendutako "aurrez aurreko prestakuntza-jarduerak eteteko" erabakia hartu da. Irakasle zein hezitzaileen kasuan on-line egiteko aukera martxan jarri duten arren, sukaldari eta garbitzaileon kasuan ez da horrela izan.
IVAP-eko klase presentzialak eten eta on-line egiteko aukera martxan jarri ez dituela-eta, Hezkuntza Sailak langile horiek beren lanpostura bidali ditu, inolako alternatibarik eskaini gabe eta euskalduntze-prozesuari kalte eginez. Horretaz gainera, liberazioak betetzen ari ziren ordezko langileei telefonoz jakinarazten die beren kontratua bertan behera utzi dutela, babesgabetasun eta zalantza egoeran utziz, idatziz ezer jakinarazi gabe.
Nahasmena izan da nagusi, gainera. Hilaren 13an, ostiralean, Lakuak -berriz telefonoz- erantzun zuen akats bat egon zela eta ez zirela moztuko indarrean zeuden kontratuak; baina ordezkapen-kontratu berririk ez egiteko erabakia hartzen zutela gaineratu zuen.
Zoritxarrez, astelehenean, hilaren 16an, Jaurlaritzak ebazpen bat argitaratu zuen, erabat diskriminatzailea. Horren arabera, liberazio-egoeran mantentzen zituen irakasleak eta lan-kontratudun dozenteak; gure kolektiboarentzat eta administrazio orokorreko langileentzat, aldiz, liberazio-etenaldia ebatzi zuen, eta, beraz, ordezko horien kontratuak mozten zituen.
Momentuak eskatzen duen eta langile gisa eskatzen zaigun erantzukizunetik, Hezkuntzako sailburu Cristina Uriarteren argudioei kasu eginez, honako hau eskatzen jarraituko dugu:
– Garbiketako eta sukaldeko langileek ere euskaraz ikas dezaten liberatuta jarraitzea, etxetik prestakuntza jasotzen, bitarteko telematikoak edo bestelako baliabide egokiak erabiliz.
– Euskara ikasteko liberazioagatiko ordezkapen-kontratuak ez moztea. Ondorioz, indarrean dauden kontratu guztiak mantenduko dira, eta kaleratze masiboak saihestuko dira (gurean 30 kaleratze)