Gaur EAEko Funtzio Publikoaren Mahai Orokorraren bilera egin da Lakuan. Oraingoan ere, LABek ez du aurrerapausurik antzeman langile eta zerbitzu publikoentzat oinarrizkoak diren baldintzetan, Jaurlaritzak murrizketekin jarraitzen baitu erretiro-txanda kontratuan, soldatetan, enpleguan, gazteberritzeetan eta euskaran. Madrilekiko menpekotasuna aitzaki, gai hauetan aurrera jotzeko borondate eza argi utzi du.
Erretiro-txanda kontratuari dagokionez, lan kontratupeko langile finkoentzako mugatzen jarraitzen du proposamena. LABetik ekarpenak egingo ditugu proposamena hobetzeko eta ahalik eta azkarren indarrean jartzeko. Neurria langile funtzionarioei eta bitartekoei zabaltzea eta negoziazioa Madrildik Euskal Herrira ekartzeko exijitzen jarraituko dugu.
LABe gazteberritze planak lantzen ari da sektoreetan, baina Jaurlaritzak ez du irizpide bateraturik eta honek galgatu egiten du kontua. Aurre-erretirorako kendutako pizgarriak berreskuratzea ere exijitzen du LABek.
Jaurlaritzak ez du hitz egin nahi langile publikoak pairatzen ari diren ahalmen ekonomikoaren galerari aurre egiteko neurriez. Madrilen erabakitzen denari so, erabaki ahalmena Euskal Herrira ekartzeko indarrik egin gabe jarraitzen du. Hala ere, sektore batzuetan muga hori altxatzeko gai dela argi utzi du: ertzantzan, hezkuntzan eta gartzeletan kasu. Hain zuzen hezkuntzan egindako borrokek ondo frogatu dute, langile borrokaren bidez, ustezko mugak gaindi daitezkeela.
Behin-behinekotasuna jaisteari dagokionez ere, ez da inoiz egon gaiari heltzeko borondaterik, deialdi publikoak eginez nahikoa egiten ari dela baitio Jaurlaritzak. Gogoratu beharra dago behin-behinekotasuna jaisteko neurriak Europako epaitegitik etorri behar izan direla, Jaurlaritzaren borondate falta historikoaren kontra.
Euskal administrazioak euskalduntzeko borondate argia adierazi du Jaurlaritzak: bai zerbitzuak eskaintzeko zein lanean euskaraz egin ahal izatea bermatzea. Hala ere, hitz dotoreak ez datoz bat Jaurlaritza egiten ari den politikekin, euskararen inguruan aurrera ez egiteak atzera egitea ekarriko baitu, eta ondorio larriekin. EAJk eta PSEk osatzen duten gobernu baten euskararen inguruko akordioek aurrera egiten ez duten planak baino ez dituzte garatuko. Duela hiru urte Euskararen Kontseiluarekin eta beste eragileekin batera egindako proposamen estrategikoan berresten da LAB.