Bihar asteazkena, ekainaren 18an, 18:00etan, mobilizazioak egingo dituzte Bilbon (Urkixo Zumarkalea, 19), Donostian (Alderdi Eder-Udaletxea) eta Gasteizen (Posta, 9) akordio markoaren aurka eta hitzarmen duina eskatzeko.
Akordio berria eta III. Hitzarmen Kolektiboari eranskin bat inposatzeak ondorio larriak izan ditzake Correos-eko langileen lan-baldintzetan eta, hedaduraz, ematen duten posta-zerbitzu publikoan. Correos-en eta bere langile guztien etorkizuna defendatzeko. Horregatik erabaki dute LAB, ESK eta ELA sindikatuek biharko mobilizazioak deitzea.
Correos-eko langileen lan-baldintzak are gehiago okertzen jarrai dezakete. Enpresak eta CCOO, UGT, CSIF eta SL sindikatuek milaka lanpostu suntsitzea ekar dezakeen akordio bat sinatu dute. Izan ere, langileen gastuak % 85etik %70era igaro daitezke 2 urtetan, ordainsari-erregimena jardueraren neurketa indibidualekin lotu daiteke, lanaldiko orduen %10 aurreikusitako kargaren arabera aldatuko den lan-egutegia ezarri daiteke, eta langileen mugikortasun funtzionalean, geografikoan eta zentroen artekoen sakondu. Horrek guztiak eragin zuzena izango du enpleguaren kantitatean eta kalitatean, baita enpresa publikoak eman beharko lukeen komunitatearen aldeko kalitatezko zerbitzu publikoan ere.
Akordio horren aurka dauden LAB, ESK eta ELA sindikatuek etorkizuneko IV. Hitzarmen Kolektiborako eta Akordiori begira, langileen eskubideei lotutako arauketa eskatzen dute, bertan jasotako gai garrantzitsuenak hobetzeko, hala nola soldata, lanaldia, kontziliazioa eta lan-osasuna, Correos-en kalitatezko zerbitzu publikoaren aldeko apustua eginez. Besteak beste, soldatak KPIrekin lotzeko klausula, asteko 35 orduak ezartzea, egiturazko lanpostu guztiak benetan betetzea eta galdutako milaka lanpostu berreskuratzea eskatzen dute, Madrildik inposatu nahi dietenaren guztiz kontrakoa.