Urriaren 8an, Eusko Jaurlaritzak Covid-19ak kutsatutako pazienteak lekualdatzen zituzten 6 anbulantzia kendu zituen osasun-garraioko zerbitzutik, eta, horrekin batera, 60 langile inguru kaleratu zituen, guztiak zaintzeko lehen lerroan lanean aritu direnak.
Pandemia baino lehen ere ez zen nahikoa asistentziazko eta ez-asistentziazko osasun-garraioa Euskadin. Hobekuntza bat behar zuen: dauden baliabideen kopurua handituz zerbitzu hobea emateko, bai anbulantzia asistentzialetan, bai ez-asistentzialetan.
Erabaki horri erantzuteko, LAB, ELA, UGT, CCOO eta ESK sindikatuok elkarretaratzeak deitu genituen hiru lurraldeetan, gure desadostasuna adieraziz eta garraio sanitarioko zerbitzua hobetzeko eskatuz, publifikazioaren bidez, eta Gotzone Sagarduy osasun-sailburuarekin eta Eusko Legebiltzarrean ordezkaritza duten alderdi politikoekin bilerak eskatuz. Gaur beste elkarretartaze bat egin dugu sindikatuok, Donostia Ospitalearen aurrean oraingoan.
Bada, azaroaren 4an, Eusko Jaurlaritzak erabaki zuen Bizkaiko lurraldean oraindik zerbitzua ematen zuten 2 baliabideak alde batera uztea, eta horrek langileak kaleratzea ekarri zuen.
Pandemiaren bilakaerari buruzko datuekin: txertaketa masiboaren, covid kasuen jaitsieraren eta askok dena amaitu dela pentsatzearen ondoren, Eusko Jaurlaritzak kaleratzea erabaki du, zerbitzua hobetu beharrean.
Erabaki hori onartezina iruditzen zaigu, eta, beraz, LAB, ELA, UGT, CCOO eta ESK sindikatuek salatu nahi dugu pandemiaren 18 hilabete hauetan ez dela ezer ikasi; izan ere, osasunean inbertitutakoa mantendu beharrean, erretiratu egiten da eta pandemia aurreko prekaritate-egoera berera itzultzen da, ez da osasun publikoa indartzen, lehentasun osoa izan behar duela ikusi denean.
Eusko Jaurlaritzak hartutako erabakia herritarren zerbitzura egongo den osasun publiko indartsua sustatzearen aurkakoa da, eta ez arlo horretan negozioa egin nahi duten enpresen interes ekonomikoen zerbitzura egongo dena. Horregatik guztiagatik, LAB, ELA, UGT, CCOO eta ESK sindikatuok urriaren 26an bilera eskaera bat erregistratu genuen Gasteizen, eta aste honetan bertan, gai horri heltzeko premiazko bilera eskatu diegu Gasteizko Legebiltzarreko alderdi politikoei, Osasun Sailak oraindik ez baitigu idazkiari erantzun.
Bilera egitea eskatzen diogu publikoki Osasuneko sailburuari, EAJ ez beste alderdi guztiak gurekin harremanetan jarri baitira bilera bat egiteko, eta ez da ulergarria gaur egun, bilera eskatu zenetik 10 egun baino gehiago igaro ondoren, gurekin harremanetan jarri ez izana.
Langileak berriz hartzeko eta ezabatutako 8 anbulantziak berriro martxan jartzeko eskatzen dugu, eta, era berean, Administrazioak zerbitzu garrantzitsu hori benetan eta zuzenean kontrolatzeko eskatzen dugu, anbulantzia asistentzialak eta ez-asistentzialak publifikatuz.