Atzo, abuztuaren 30an, Zarautzeko Elesa Transformadores SAU enpresan lanean ari zen A.J.L. 47 urteko langileak lan istripu ez traumatikoa pairatu zuen eta, denbora luzez suspertzen ahalegindu ziren arren, han bertan hil zen. Dagoeneko, 2023an Euskal Herrian gutxienez 33 langile hil dira euren lanpostuetan, 7 Araban, 5 Bizkaian, 10 Gipuzkoan, 6 Nafarroan, 2 Iparraldean eta 3 kanpoan. Lehenik eta behin, LAB sindikatuak elkartasuna adierazi nahi die senide, lagunei eta hurkoei.
Istripu ez traumatikoak, bihotzekoak, iktusak eta antzekoak bilakatu dira lanean gertatzen diren heriotzen lehenbiziko eragileak.
Gaitz kardiobaskularrak ez dira kasualitatea, ez dira ausaren ondorio, patronalak esan ohi duen bezala. Langileon bizi eta lan baldintzek eragiten dituzte eta, nagusiki, sektore konkretuetan gertatu ohi dira, kasuan kasu, estresak, erritmo azkarrak, presioak, autoritarismoa, lan araudia, azpikontratazioa eta prekaritatea bezalako faktoreak ere tarteko.
LABen argi daukagu bizi eta lan baldintza duinak behar ditugula, lanetik etxera onik eta bizirik bueltatzeko eskubidea dugula.
Aurten jada 33 langile hil dituen lan istripuen lakra honekin bukatzeko bide bakarra borroka eta antolakuntza dira. Izan ere, lan harremanen eta jolas arauen aldaketa batetik etorriko baita irtenbidea.
LABek indarrez eta erabakitasunez borrokatu du egungo sistema eraldatzeko, mozkinak lehenesten dituen, bidegabea den eta bizigarria eta bideragarria ez den sistema kapitalista erauzteko, eta langileon bizitza eta osasuna erdigunean jarriko dituen jendarte justu, berdinzale eta bizigarri bat eraikitzeko.