San Jose Zentroko egoiliarren profila aldatzeko asmoak sortutako arazoak direla eta, behin ikusita PAGNAk ez duela oraindik konponbide eraginkorrik eman eta apirilaren 19an LABek Lan Ikuskaritzan aurkezturiko segurtasun eta lan osasunaren inguruko salaketari jarraiki, sindikatuak Osasun Publikoaren eta Lan Osasunaren Nafarroako Institutuarengana ere jo du oraingoan, horren esku hartzea eskatzeko.

Aipatu ekimena, PAGNAren (ANADP, Agencia Navarra de Autonomía y Desarrollo de las Personas, gazteleraz) asmoak ezagutzera eman zenetik LABek egindako gainerakoekin bat egiten duena, beste ekimen batekin batera ekartzen dugu: Administrazioari luzatutako deia, gizartearen aurrean alegia. Nafarroako Gobernuak hemendik legealdia bukatzera bitarte hainbat lege aldaketa egiteko asmoa duela jakinda, aipatu aldaketek zentroetan eta beraien arretan eragina izanen dutela kontuan hartuta, zera eskatzen diogu Administrazioari: konpromisoa hartzeko, gizartearen aurrean gainera, aipatu aldaketak langileekin adostuko dituela eta horien ekarpenak kontuan hartuko dituela azalduz. Ondokoak ditugu horren helburuak: arreta benetan hobetzea eta langileen eskubideak bermatzea.

PAGNAko arduradunek zuzen erantzuteko eskaera da, behin ezagututa Nafarroako Gobernuak aldatu nahi dituela ratioen zein Gizarte Zerbitzuen Zorroaren dekretoak eta 15/2006 lege foru bera ere, abenduaren 14koa, Gizarte Politikoetakoa. Gure ustetan, aukera baliotsua da errealitatearekin bat egin behar duen arautegia lortzeko, besteak beste beharrei erantzun ahalko lieketen berariazko arloetako langileen taldeak ezarriz.

Jakin badakigu arauen aldatzearena epe ertain-luzeko bidea dela. Baina jakin badakigu arazoak segitzen duela ere, egunerokoan, eta Administrazioak aurre egin behar dio lehenbailehen. Hori dela eta, batetik, irtenbide eraginkorrak jartzeko eskatzen diogu PAGNAri, eta bestetik, deia luzatzen diegu langileei deituko ditugun mobilizazioetan eta elkarretaratzetan parte hartzeko.