Abian gara. Ekintza Sozialeko Komunitatea errealitate bat da. Bada, bere jaiotzaren lehen orduetatik erakutsi dugu zein den komunitate berriaren izaera: ekintzailea da. Hortaz, hitzetatik ekintzetara pasa gara Irun, Atarrabia, Basauri eta Gasteizko topaketak amaitu bezain pronto, eta mobilizazio desberdinak gauzatu ditugu.
Irungo topaketaren ondoren egin dugu ekintza nagusia, Irun eta Hendaia lotu dituen mobilizazioa, “Mugak apurtu, zubiak eraiki” lemarekin egin duguna. Horrela, Gipuzkoa eta Lapurdi arteko Santiago zubia zeharkatu dugu, egunero muga hau baldintzarik okerrenetan igarotzen duten langile migranteen errealitatea salatzeko. Muga arriskutsua bada, aplikatzen zaion salbuespen polizial eta politikoagatik dela erakutsi dugu eta hainbat migratzailek muga modu duin eta seguruan zeharkatzea ahalbidetu dugu mobilizazioaren bidez. Garaia da bizitzari mugak ireki eta kapital anker eta esplotatzaileari ezartzeko.
Atarrabian, supermerkatu handi batean trantsizio ekosozialistaren aldeko aldarrikapena egin dugu. Kapitalismo berdearen ameskeriaren aurrean, sozialki eta ekologikoki jasangarria izango den trantsizioaren alde agertu gara, eta egungo kontsumo eredua zalantzan jartzeko hainbat produktuen jatorria eta ekoizpen eredu kaltegarria salatu ditugu. Hala, apaletan dituzten iruzurrezko produktuak etiketatu ditugu.
Basaurin, berriz, manifestazio ekintzailea egin dugu. Pozokoetxe plazatik hasita, aste honetan bertan izandako eraso homofoboa salatu, pentsiodunekin batera banketxeetako arreta eredua kritikatu, herriko anbulategiko errealitatean arreta jarri eta gazte mugienduarekin batera etxebizitzaren espekulazioa gaitsetzi ditugu ehunka lagunek hainbat ekimenen bidez.
Larunbateko ekintza hauez gain, ostegunean Gasteizen bildu ginen. Simon Bolibar parkean, gerrilla komunikatiboaren bidez, langile klasearen aniztasuna aldarrikatu eta balioan jarri dugu, homogenizazio eta diskurtso faxisten aurrean propaganda ekimen erraldoia eginda. Topaketaren ostean, mural koloretsu bat osatu genuen, “Herri anitza eta batua inoiz ez garaitua” leloarekin.
Hau hasiera baino ez da. Gure gaitasun eraldatzailea antolatzeko urrats berriak ematen jarraituko dugu eta LAB sindikatua langile subjektu osoarentzako borroka tresna eraginkorra izateko lanean jarraituko dugu.
