2024-06-25
HomeLan Osasuna IdazkaritzaPrekarietatea HiltzaileaIrmoki salatzen dugu Kasedako lan istripua eta ABLEek dakarten arrisku erantsiaz ohartarazi...

Irmoki salatzen dugu Kasedako lan istripua eta ABLEek dakarten arrisku erantsiaz ohartarazi nahi dugu

LAB sindikatuak bere elkartasun eta babesa helarazi nahi die Kasedako Viscofan lantegian hildakoaren eta zauritutakoaren familiei, lagunei eta lankidei. Eta, aldi berean, irmo baino irmoago salatu nahi du gertaturikoa -berehalako ikerketa zorrotza behar duena- eta ohartarazi nahi du ABLE aldi baterako lan enpresek kontrataturiko langileek pairatzen duten arriskugarritasun erantsiaz.

Kasedako Viscofan lantegian gaur hildako behargina – F.U., 46 urtekoa eta Zarrakaztelun bizi zena- 2019an Euskal Herrian lan istripuetan hildako 32. langilea da; bederatzigarrena Nafarroan. LABek jakin ahal izan duenez, langileak hamabi hilabete inguru zeramatzan Viscofanen lanean, ABLE batek kontratatua hainbat opor eta gaixoaldi ordezkapen egiteko.

Gauza jakina da ABLEek kontrataturiko langileek prekaritate handiagoa izateaz gainera istripuak izateko aukera gehiago dituztela, lantoki horretako segurtasun kontuetan zuzenean kontrataturiko lankideek baino formakuntza txikiagoa baitute, nahiz eta gehienetan lan berdina egin. Hala, ABLEek kontrataturiko pertsonek izaten dituzten lan istripuen kasuetan, ABLEa kontratatu duen enpresak ezin du bakarrik istripu zehatz hori aztertu; horretaz landara, hausnarketa sakon eta zintzoa egin beharko luke jendea zuzenean ez kontratatzeak dakartzan ondorio humano eta sozialen inguruan.

Nafarroako enpresetan gertatzen den lan ezbehar tasa altuak laneko segurtasun eta osasun gaietan utzikeria argia adierazten du. Egiten diren prebentzio politikak ez dira nahikoak gure lurraldean lan-istripuen gorakada erakusten ari diren bezala. Langileen bizitza eta osasuna oso azpitik daude enpresen balio eskalan, eta argi gelditzen da gure osasuna ez dela patronalaren eta erakunde publikoen lehentasuna.

Segurtasun neurri handiagoak eta egokiagoak ezartzea izan behar da enpresetan erabateko lehentasuna, benetan amaitu nahi badugu urtero dozenaka langile eramaten dituen gaitz honekin. Lan istripu guztiak prebentzio neurri egokiekin saihestu daitezke, eta datuak ikusita, ez dira kontuan hartzen enpresen eguneroko bizitzan.

Azkenik, LABek dei egin nahi dio langile klaseari parte har dezan antola daitezkeen mobilizazio guztietan, Kasedan gertaturikoa salatzeko eta hildakoaren zein zaurituaren lankideei elkartasuna eta babesa adierazteko.  

 

 

AZKEN ALBISTEAK | ĂšLTIMAS NOTICIAS

Ilundain gizarteratze eta laneratze enpresarekin adostu dugu bigarren hitzarmenak erosteko ahalmena bermatzea eta atxikimendu sozioafektiboa barne hartzea

Hilabete batzuetako negoziazioen ondoren, LAB sindikatuan —ordezkaritza sindikal osoa baitugu— akordioa lortu dugu Nafarroako Ilundain gizarteratze eta laneratze enpresarekin, bere bigarren hitzarmena sinatzeko. Hitzarmen horrek nabarmen hobetzen du aurrekoa, soldata taula osoan KPIaren igoera ziurtatzen du, eta, lehenbiziko aldiz, aukera ematen du langile bakoitzak ordaindutako baimenak lor ditzan ahaidetasunik gabeko pertsonen zaintzarako.

Zerbitzu publikoak indartzeko hitzetatik ekintzetara pasatzeko eskatu diegu EAEko erakunde eta alderdiei

Sindikatuok elkarretaratzea egin dugu gaur Espainiako Gobernuak Gasteizen duen ordezkariordetzaren aurrean, enplegua eta langile publikoen soldatak hemen erabakitzea aldarrikatzeko.

Duela hamar urte eroritako Nafarroako Industria Grafikoaren hitzarmen kolektiboa berreskuratzearen alde gaude

Gaur goizean Iruñean eman dugun prentsaurrekoan azaldu dugu Nafarroako Industria Grafikoaren hitzarmena 2014an erori zela, eta ordutik sektoreko langileen lan baldintzek nabarmen egin dutela okerrera. LABen uste dugu badela garaia tresna hura berreskuratzeko eta langileen baldintzak duintzeko; horregatik, udaren bueltan sektoreko intersindikala deituko dugu.