Eskola ezberdinetako zuzendaritzetatik egindako ordezkapen eskariei entzungor eginez, irakasleen ordezkapenetarako lanpostuak inprobisazioz eskaintzen ari dira, adostutako irizpideak kontuan izan gabe. Horren ondorioz, langile askok beren antzinatasunagatik dagozkien lan baldintza baino okerragoak onartu behar izan dituzte. Askotan, etxetik ehundaka kilometrotara dauden lanpostuetan, murriztuetan edo langabezian egotera kondenatuz.
Egoera honek irakasleekiko begirune falta erakusteaz gain, beste behin erakusten digu Eusko Jaurlaritzak Euskal Eskola Publikoa ez duela lehentasun bezala hartzen. Hori gutxi balitz, lanpostuak inprobisazioz eta bermerik gabe banatzeak, zuzenean talka egiten du ordezkoen arautegiarekin.
LABek argi du milaka langileren bizitzak ez direla joko politikorako tresna. Ez dugu onartuko utzikeriaren ondorioz milaka langilek beren lanpostuak kolokan izatea. Horregatik, prest gaude kaltetuekin bide juridikoa zabaltzeko.
Hartara, erreklamazioak jasotzen ari gara eta jasotzen jarraituko dugu. Gainera, kaltetuko langile guztiak gonbidatu nahi ditugu, datorren astelehenean, irailaren 16an 11:00etatik 11:30era egingo dugun elkarretaratzera. Gasteizko Lakuaren parean, entzungor egiten duen Hezkuntzan sailaren aurrean ikusgarri egin gaitezen. Aski delako, hezkuntzako langileak zenbaki hutsa besterik ez garelako, konponbidea orain!
