Haurreskolak Partzuergoko kudeaketako langileen greba deialdia egin du LAB sindikatuak, abenduaren 23tik urtarrilaren 24ra. Grebaren lehen egunean, elkarretaratzera deitu dugu Lakuan. Hain zuzen ere, Lakuan bertan egin da Haurreskolak Partzuergoak deitutako Mahai Negoziatzailea, kudeaketako langileen gaia jorratzeko.
Gaur, LAB sindikatuak deitutako Kudeaketako Arloko langileentzat hilabeteko grebaren lehenengo egunean, deituak izan gara Haurreskolak Partzuergoko Mahai Negoziatzailera.
LABentzat ezinbestekoa jotzen genuen bere gain hartuko zuen proposamen bat egotea:
-Kudeaketako arloko langileen lan zamak txikitzeko helburuarekin, lanpostuen zerrenda handitzea
-Kudeaketako langile guztion ekiparazioa berehala martxan jartzea.
-Langile hauen ordezkatzeko egoerak, ordezkoen araudia eta barne sustapenak egiteko dokumentuak borobiltzea.
-Egin beharreko OPE deialdi horretarako konpromiso argi bat, zabaltzen ari den kontsolidazio prozesuekin parte hartzeko.
Izan ere, abenduaren 9an burututako mahai negoziatzailean Partzuergoak aurkeztu zigun proposamenean, Kudeaketako Lanpostuen Zerrendari dagokionez, ez zen jasotzen ezta momentu honetan dauden langileen kopurua, eta Hezkuntzako kudeaketako langileekin soldata eta kategorien ekiparazioari dagokionez, ez zuten zehazten inolako prosedurarik. Aitzakia, aurrekontuen legea eta negoziatzen ari diren aurrekontuak.
Gauzak horrela, alde guztien artean urtebeteko lanketaren ostean, aurkeztutakoa iruzurra zela iruditu zitzaigun eta mahai negoziatzailetik altxa ginen. Proposamena afiliatu zein gainontzeko langileekin kontrastatu ostean, greba erregistroa egitea erabaki genuen.
Gaurko Mahaira itxaropentsu etorri bagara ere, egin diguten proposamena bide beretik joan da, hau da:
-Egun dauden kudeaketako langileen kopuru bera eskeintzen digute. Urtarrilean lanpostuaren zerrendan argitaratuko zutela, epeetan inolako zehaztasunik gabe.
-Beste 3 lanpostu berri eskaintzen dituzte irailari begira, inolako bermerik gabe.
-Ekiparazio prozesurako ez dute inolako bermerik ematen. Prozesu hau burutu ahal izateko, lanpostuen Zerrenda berria eta hitzarmenareko kategorien aldaketen argitalpenarekin baldintzatzen dute.
LABek egin zuen Lanpostuen Zerrendaren proposamenean, lanean dauden langileen kopuruaz gain, lanpostu berri batzuk proposatzen zituen, egun langile hauek duten lan zama txikitzeko helburu argiarekin. Partzuergoak eskaintzen dituen 3 lanpostu berri horietaz gain (euskara eta berdintasun teknikaria, arreta goiztiarra eta informatikaria) LABek bat gehiago (Planifikazioko Arduraduna) eskatu du Lanpostuen Balorazio Batzordeak egindako lana haintzat hartuz.
Ekiparazio prozesuari dagokionez, LABek eskatu du beranduenez 2020ko urtarrilaren 1eko atzeraeraginez bermatzea.
Bestalde, 2018ko akordioan jasota dagoen OPE deialdiari begira, momentu honetan Parlamentuan eztabaidagai dagoen kontsolidazioko prosezua egiteko konpromisoa eskatu dugu kudeaketa arloarentzat, eta, era berean, hezitzaileen kolektiboan.
L
ABek egindako proposamena data hauetan kontrastatzeko baldintzarik ez dutela ikusita, urtarrilaren 9rako beste mahai negoziatzaile bat deituko dutela adierazi digute. Berriro ere, agerian utzi dute negoziaziorako gaitasun eza eta Haurreskolak Partzuergoarekiko utzikeria.
Aipatu behar dugu STEILAS eta ELAri luzatutako elkarlanerako eskaintzak ez duela emaitzarik eman eta, trukean, guk deitutako greba desitxuratzeko ahaleginak egiten ari direla. Horrekin lotuta, gaurko mahaira LABek proposamen zehatza eraman badu ere, STEILASek zalantzak adierazi ditu eta ELAk argi esan du ez duela akordiorik sinatuko.
Gauzak horrela, STEILAS eta ELA sindikatuei, orain arte bezala, elkarlanerako deia luzatu diegu, garrantzitsua delako kudeaketa alorreko langileentzat, lan baldintzak hobetuko dituelako eta Haurreskolak Partzuergoko kudeaketa eraginkorragoa izango delako.
Era berean eskerrik beroenak hezitzaileek adierazi dizkiguten elkartasun mezuengatik. Lanean jarraituko dugu Haurreskolak Partzuergoak ematen duen hezkuntza zerbitzuaren kalitatea hobetu dadin eta doakotasuna lortu arte!