Ikasturte berezia da LABentzat, urte hasieran Eusko Jaurlaritzak, Foru Aldundiek eta EUDELek konpromisoa hartu zuten familiaren eta haurren aldeko politika publikoak garatzeko, Familien eta Haurren aldeko Ituna sinatuz.
LABetik esan genuen, beste gauza batzuen artean, plan honen baitan ez dela jasotzen jaiotzatik haurrek aukera berdinasunean daukaten hezkuntza eskubidea eta ez zela inolako urratsik ematen haurreskolen doakotasunaren bidean.
Bestalde, Legebiltzarrak, martxoaren 21ean familia politikari buruzko eztabaida monografikoa burutu ostean, Jaurlaritzari eskatu zion Haurreskolak Partzuergoan doakotasunaren bidean lehen urrats gisa eta progresibotasunean sakontzeko, 18.000 euro baino gutxiagoko diru sarrerak dituzten familientzat doakoa izan dadila sarbidea.
Gauzak horrela, LABek Eusko Jaurlaritzari kuota berrikuntza hau gauzatzea eskatu du hurrengo ikasturteko matrikulazio epeari begira, eta ez da ezer egin. Haurreskolak Partzuergoko Zuzendaritza Batzordeko Lehendakaria den Cristina Uriartek, erantzun zigun aurrekontuaren berrikusi eta azterketa sakona egitea eskatzen zuela neurri honek. Aipatu zuen 2018-2019 ikasturtean kuotak berrituko direla, prozedura egokitzeari bideratutako erabakietan batera.
Eusko Jaurlaritza lana eta familia uztartzeko neurri berrien gaineko itzelezko propaganda egiten ari den arren, momentuz ez dakite haurreskoletan kuotei dagozkien neurriak ez nola garatuko dituzten, ez noizko ezta zein baldintzetan ere. Are gutxiago, haurreskolen doakotasunean progresibotasuenan sakontzeko neurriak. Zehaztasun falta ikusten dugu honetan.
Haurreskolak Partzuergoa, 0-2 haurrei hezkuntza zerbitzua emateko Eusko Jaurlaritza eta udalerri batzuen arteko hitzarmena den heinean, LABen iritziz administrazioak haur hezkuntzako lehenengo zikloko kalitatea, doakotasuna eta euskaldun izaera bermatu beharko lituzke, hau da, 0-3 urte bitarteko haurren matrikulatzeko eskubide unibertsala.
LABek ez du iruzurrik onartuko eta Haurreskolak Partzuergoaren doakotasunaren aldeko borrokan jarraituko du, hezkuntza sistema propioa iruten.