Ika-mika handia eragin du atzo PSE-EEk euskarak administrazioan izan behar duen lekuaren inguruan aurkeztutako bideoak. PSE-EEk probokazioaren bidea aukeratu du hauteskunde kanpainan lekua egiteko. Horrek ekarri ahal dizkion etekin edo galera elektoraletatik harago, LAB sindikatuak bideoan esandakoa suposatzen duen ageriko zentzugabekeria berretsi nahi du. 

Izan ere, bideoan esaten den bezala "ez da beste inon gertatzen", bertako administrazioan ez bada, langile zein herritarroi administrazioarekiko harremanean, izan lan jardueran edota zerbitzu publikoak eskuratzerakoan, dagozkigun hizkuntza eskubideak hamarkada luzez urratuta aurkitzea. Idoia Mendiak esaten duen bezala, bertako administrazioan egoera "bidegabea" ematen da, bai; baina XXI. mendean euskaraz lan eta bizi nahi duten herritarrak (baita langileak ere) bigarren mailako herritar gisa tratatuak direlako. Hobe lukete bidegabekeria hori gainditzeko konpromisoa hartuko balute. Eta "aukera berdintasunaz" hitz egiten hasita, ondo legoke bere alderdiko kide den Patxi Lopezek Lehendakari izateko ze diskriminazio egoera pairatu zuen azaltzea.

PSE-EEk gatazka eremu linguistikoan kokatu nahi du, euskaraz dakiten eta ez dakitenen arteko liskarraldiak sustatuz. Baina arazoaren muina demokraziaren ingurukoa da; guztion eskubideak bermatuko dituen administrazioa sustatzen duten eta sektore sozial baten hizkuntza eskubideak baztertuko duen administrazioaren alde egiten duten alderdien artekoa baizik.

Horregatik, LAB sindikatutik guztion eskubideak bermatuko dituen administrazio eta sektore publikoaren alde egiten dugu; baita hizkuntza eskubideei dagokienez ere. Hizkuntza eta kulturen arteko talkak areagotu nahi dituztenen probokazioetan ez erortzea eta euskararen normalizazioaren aldeko lanean jarraitzea bide zuzenena da. Administrazioetako arduradun politikoek ere bide horri jorratu beharko luketelarik.