47ak Herrian dinamika bilera-erronda egiten ari da, irailaren 16an auzipetuko dituzten 47 herritarren eta 11/13 makrosumarioaren egoera bertatik bertara azaltzeko. Euskal jendartearen gehiengoa osatzen duten alderdi, sindikatu, eragile eta sektoreetako ordezkariekin bilduko dira hurrengoa asteetan, eta lehen hitzordua gaur egin dute; LAB sindikatuarekin, hain justu. Igor Arroyo idazkari nagusi ondoko eta Eulate Zilonizaurrekoetxea Exekutiboko kidea ordezkatu dute sindikatua bileran. Bertan, gure elkartasun eta babes osoa adierazi diegu auzipetuei, baita egingo diren mobilizazio eta ekimenei ere. 

LABen iritziz, herri honek irtenbideak behar ditu, ez zigorra, kartzela, mina eta sufrimendua areagotzen dituzten bide agortuak. Epaiketa honek berriz ere uzten du agerian Espainiako Estatuaren izaera antidemokratikoa, gaindituta egon beharko liratekeen bide errepresiboetan sakontzearekin tematuta jarraitzen duela erakusten baitu.

Giza eskubideak, demokrazia eta etorkizunaren alde, indarrak bildu eta erantzuteko deia egiten diegu euskal langileei, epaiketa bertan behera uzteko deia egitearekin batera.

Hain zuzen ere, 601 urteko kartzela zigorrak eta 117.600 euroko isun eskaerak dituzte auzipetuek aurrean. Presoen eskubideen inguruan egindako lanagatik daude herritar hauek jo-puntuan. Bada, epaiketa hauekin amaitu eta presoen gaia konpontzeko garaia da, guztiak kaleratze bidean jarriz.