Agerraldia egin dugu sindikatuok, joan den maiatzean hasitako negoziazioaren egoeren berri emateko. LAB, ELA, UGT eta CCOO sindikatuok plataforma bateratu bat aurkeztu genuen, eta, hilabete batzuk geroago, patronalak ez du Nafarroako helduen egoitzetako lehen hitzarmena negoziatzeko borondaterik. Nafarroako Gobernuak, berriz, erantzukizun publikoa izan arren, patronalaren jarrera babestu besterik ez du egin.

Egoera hau ikusita, urriaren 21ean, elkarretaratzea egingo dugu LARES erakundearen egoitzaren aurrean, hots, sektoreko patronal nagusienetako baten aurrean.

Nafarroan 4.500 langilek egiten dute lan sektorean, herrialdean dauden 70 zentrotan. Hitzarmen bat aldarrikatzen dugu eurentzat, sektoreko lehena litzatekeena, lan baldintza duinak izan ditzaten, zerbitzu duina eskaini ahal izateko.

Urriaren 14an, hurrengo negoziazio mahaia dago. Sindikatuok ohartarazi dugu, bilera horretan aurrera egiten ez bada, mobilizazioak areagotuko ditugula; greba egitea ere aurreikusten dugu hemendik eta urte bukaera arte.