Greba ia erabatekoa izan da Gipuzkoako papergintzan. Gure datuen arabera, grebaren jarraipena %90koa izan da. Produkzioa geldirik dago lantokietan. Beraz, grebak bilatzen zituen helburu guztiak bete dira. Hernanin egin dugu gaur manifestazioa, eta Tolosan egingo dugu bihar (Triangulo plaza, 12:00).
Gipuzkoako papereko langileek ozen eta argi hitz egin dute: akordio duina nahi dute eta ADEGIren mehatxua eta jarrera inmobilista ez dituzte onartzen. Grebaren emaitzak ikusirik, ADEGIri exijitzen diogu jarreraz aldatzea, egiazki negozia dadin eta papereko langileek sortutako aberastasuna banatu dezala. Gogoratu nahi dugu sektorearen egoera ona dela, enpresek oro har irabazi handiak izan dituztela. ADEGIri exijitzen diogu egoera on honi erantzuten dion proposamen bat mahai gainean jar dezala. Bitartean, mobilizatzen jarraituko dugu akordio duin eta justu bat lortu arte. Bihar beste greba egun bat daukagu eta guztira 16 greba egun deitu ditugu.