COVID-19ak gaur egun sortu duen egoera dela eta, Gasteizko Udalak osasunaren aldetik askoz haratago doazen murrizketa batzuk egitea proposatzen ari da. Duela bi aste, hauteskunde kanpainan, Udalarekin bildu ziren eta ikusi zuten proposatutako murrizketek nabarmen gaindituko zutela erakundeak berak aurretik langileoi bermatutakoa. Langileek agerraldia egin dute gaur, greba mugagabe partzialak iragartzeko. Abuztuaren 10etik aurrera izango dira, eta egunean lau orduko lanuzteak egingo dituzte (12:00etatik 14:00etara eta 17:00etatik 19:00etara).

Hauxe da agerraldian irakurri duten adierazpena:

Gure kolektiboak honako arazo hauei egin behar die aurre:

Udako soroslei dagokienez:

 Udako Kanpainaren hasiera uztailaren 1ean izan zela kontuan hartuta, hilabete eta erdiko enplegua eta soldata galdu ditugu. Horri guztiari gehitu behar diogu ez zaigula eman ERTE batean sartzeko aukerarik, ezta zuzenean Udaletik kobratzeko aukerarik ere, Alarma Estatuaren Errege Dekretuan jasotzen den bezala.

 Murrizketak egin dira bai langile kopuruaren aldetik eta baita igerilekuak irekitzeko eta ixteko ordutegietan ere. Gainera, instalazio horietako materiala berrikusteko eta desinfektatzeko behar diren tarteak ezabatu dira.

 Ez dugu higiene eta osasun-neurriak ziurtatzeko protokolo eraginkorrik, erabiltzaileen zein langileen osasuna arriskuan jarriz.

 Behin-behinekotasuneko eta lan-prekarietateko egoera jasanezina bizi dugu. Kasu batzuetan, ez dira hitzarmenean ezarritako epeak bete eta egoera kaotikoak gertatu dira; esaterako, langile batek 2 orduko aurreabisuarekin bere lanpostura joan beharra.

 Era berean, langileok ez daukagu norbera babesteko eta gure senideak ez kutsatzeko beharrezkoak diren babesteko ekipamendurik.

Igerileku estalietako sorosleei dagokienez:

 Materiala berrikusteko, instalazioa behar bezala dagoela egiaztatzeko eta desinfekzio eraginkorra egiteko beharrezkoa eta ezinbestekoa den denbora bertan behear geratzera egin behar diogu aurre.

Begiraleei dagokienez:

 Aurreko ikasturteko kirol-jardueren programaziorako aurrekontu-partida aurtengoaren berdina dela jakin ondoren, ikusi dugu eskaini beharreko 24.186 plazen ordez 9.500 plaza baino ez zaizkiela eskaini herritarrei; hau da, 14.686 plaza gutxiago. Beste era batean esanda, % 61eko murrizketa.

 Gure ustez, Gasteizko Udalak modu ikusezin batean asi da ikastaro-kopurua murrizten. Jarduerak hilean behin egitera pasa dira, ordutegi konplexuetan, eta horietako batzuk ezabatu ere egin dira, igerilekuko jarduera batzuk adibidez.

 Bestalde, ikastaroen kopurua izugarri murriztearen ondorioz, gure lanpostuen zati handi bat suntsitu egiten da, eta geratzen diren gutxi horiek prekarioak dira.

Egoera honen aurrean, planto egin behar dugu. Zugatik plantatzen gara. Zure osasunagatik gelditzen gara, zure segurtasunagatik, zure ongizatearen erantzule garelako. Gure adinekoen segurtasuna bermatzeko. Baina guregatik ere gelditzen gara, gure familiengatik, gure seme-alaben mantenua ziurtatzeko. Borroka honetan parte hartzeko eskatzen diegu herritarrei. Gure ustez, azaldutako murriketek langileei ez ezik, ikastaroen eta kirol-instalazioen erabiltzaile guztiei ere eragiten diete. Herritarrok krisiaren ondorioak pairatzeaz nazkatuta gaude, 2008an gertatu zen bezala. Egoera honetan daude Udalen eta Eusko Jaurlaritzaren azpikontratatutako beste sektore batzuk ere. Horregatik, elkartasuna adierazi nahi diegu langile hauei, zerbitzu publiko duinak, seguruak eta kalitatezkoak aldarrikatzeko borrokan.