Gasteizko kale garbiketako plantilla elkarretaratzea egin du jendartean ezagutarazteko zein egoera bizi duten eta argi esateko honi ez diotela konponbiderik eman nahi, ez enpresa esleipendunak, ezta udalak berak ere.
Hilabete asko daramatzate negoziatzen, denbora gehiegi. Iaz, LAB, ELA eta CCOO sindikatuok homologazio itunarekin lortutako guztia hitzarmenean jasotzeko asmoaren berri eman genuen. Enpresaren ezezkoaren aurrean, udalarekin biltzeko erabakia hartu genuen eta honen erantzuna izan da ez duela bermatzen kontratuaren pleguetan homologazio-ituna agertuko denik.
Egoera hau oso kezkagarria da. Homologazio ituna alde bakarretik hautsi daiteke, bai atal sozialak bai udalak hala erabakitzen badute. Horrek ibilbide juridiko luzea hastea ekarriko luke. Guk, aldiz, eskubideen galera saihesteko, hauek hitzarmenean jasotzea baino ez dugu nahi.
Horren aurrean, udalak ezin duela hau bermatu adierazteaz gain, gai hau eztabaidatzeko baldintza bezala jarri du batzordearen ardura dela lan absentismoa murriztea. Absentismo horren zergatiak ezagutzeaz ez dira arduratu, ez udala ez enpresa, ezta egoeraren benetako balorazioa egiteaz ere. Egoera horiek, kasu askotan, saihestu ahal izango lirateke enpresak istripuak, lan-kargak eta abar ez gertatzeko egindako proposamenak aztertuko balitu.
Plantilla elkartu bat behar-beharrezkoa da egoera honetan. Izan ere, gure lanpostuak eta lan baldintzak ezin dira defendatu gure osasunaren kaltetan, udalak nahi duen bezala. Gure lan baldintzak eta eskubideak bermatu behar ditugu, inongo oztoporik gabe. Ezin ditugu galdu hainbeste denbora eskaini eta hainbeste lan egin izanaren ondorioz erdietsitako lan baldintzak.
Gasteizko kale garbiketako langileen homologazioa defendatzera atera gara kalera
