Programa Sozioekonomikoaren aurkezpenean jakinarazi bezala, enpleguaren, zaintza lanen eta ondasunaren banaketaren alde borroka egiteko unea da, bai lantokiz lantokiko borroken bidez, baita mobilizazio orokorren bidez ere. Norabide horretan ekarpena egiteko, mobilizazioa egin dugu Bilbon, Eusko Jaurlaritzaren egoitza eta Iberdrola Dorrearen artean. Amaiera ekitaldian, borrokaren adibide diren zenbait ordezkariren aldarrien ostean, Garbiñe Aranburu idazkari nagusiak hitza hartu du.

Hain zuzen ere, Euskal Herritik eta Euskal Herrirako Greba Orokorra egiteko garaia dela azpimarratu du: “Posible egin dezagun Euskal Herrian Madrilen posible ez dena. Euskal Herrian borroka dezagun, Jaurlaritza eta CONFEBASK, Nafarroako Gobernua eta CEN, presionatzeko eta langileen mesedetan izango diren erabaki eta politika publikoak garatzeko”.

Garbiñe Aranbururen hitzetan, “ziklo mobilizatzaile berri bat irekitzeko arrazoiak soberan daude, greba orokor berri baterako arrazoiak soberan daude. Greba Madrilera begira, bai, greba Madrileko erabakietan eragiteko helburuarekin, bai, baina greba, batez ere, Euskal Herritik eta Euskal Herriarentzat”.

Irekitzen ari garen mobilizazio ziklo berriak emaitzak emango dituen ziurtasun osoarekin bagoaz Grebara. “Bagoaz Grebara irekiak ditugun borroka sindikal eta sozialei babesa eta bultzada berri bat emateko, etorkizunean borroka gehiago pizteko baldintza berriak sortzeko. Greba Orokorrak bestelako herri mugimenduekin elkarlana sustatzeko aukera ere ematen digu; pentsionistak, mugimendu feminista, gazteak, migranteen eskubideen defentsan ari direnak… Bagoaz Grebara, Madrilen eta Euskal Herrian eragin asmoz, Patronalari eta bere menpeko Gobernuei abisu argi bat bidaltzeko”, adierazi du.