Hainbat sindikatuk martxoaren 8ko greba erregistroa egin dugu gaur Bilbon zein Iruñean. LABeko idazkari nagusi Garbiñe Aranburuk hartu du hitza Bilbon, Eusko Jaurlaritzaren egoitzaren aurrean, eta gogoratu du emakumeek egiturazko diskriminazioa pairatzen dutela egungo sistema kapitalista, heteropatriarkal eta kolonialistan.
Garbiñe Aranbururen hitzetan, “greba feminista egungo sistema zalantzan jartzeko eguna izatea nahi dugu. Izan ere, egungo sistema kapitalista, heteropatriarkal eta kolonialistaren barruan, emakumeok egiturazko diskriminazioa pairatzen jarraitzen dugu”.
Sindikatutik borroka feministari eta Euskal Herriko mugimendu feministari bultzada eman nahi diegula nabarmendu du: “Mugimendu feminista indartzen ari da eta sistema bide desberdinak erabiltzen ari da aurrerabide hori gelditzeko. Modu zuzenean egiten du, ultraeskuindarrei eta faxismoari hauspoa emanez, baina zeharka ere ari da egiten, gure diskurtsoa eta aldarrikapenak bere egiten, baina pairatzen dugun diskriminazio errealitateari inolako konponbiderik eman gabe. Hauxe ari da gertatzen politika publikoekin edo enpresen berdintasun planekin; aurpegia zuritzeko besterik ez dituzte erabiltzen”.
Greba feminista oso garrantzitsua izango da sindikatuaren ildo feminista indartzeko. Hain zuzen ere, LABeko idazkari nagusiak azaldu du grebak zaintza lanak ikusgarri egiteko eta hauek balioan jartzeko balioko duela, baita sexuaren araberako lanaren banaketak ekartzen dituen diskriminazioa eta esplotazioa agerian uzteko ere. “Iazko plantoak indartu egin ditu sektore feminizatuetako borrokak”, adierazi du.
Martxoaren 8ak ere klase subjektua berregituratzeko balioko du: “Langileen kolektiboen barruan errealitate desberdinak daude eta emakumeon errealitatea ere oso anitza da, baina gure borrokak kolektibizatu behar ditugu”.
Greba Euskal Herritik Euskal Herrirako izango dela azpimarratu du Garbiñe Aranburuk: “Demokratizazioaren bidean, sistema hau eraldatzeko pausoak eman behar dira. Gure gorputzen gainean erabaki nahi dugu, eta dena nahi dugu erabaki. Emakume askeak izan nahi dugu, herrialde libre eta feminista batean”. Hain justu, aldarrikapen hori bera egin genuen urtarrilean, LABeko emakumeon batzarrean.