Bizkaiko Foru Aldundiko zentroak garbitzen dituzten Garbialdiko langileek asteak daramatzate euren eskubideen defentsan mobilizatzen, eta orain arte aldundiko arduradunen artean inork ez du euren egoeragatik interesa erakutsi. Gaur, elkarretaratze bat egin dute berriro, eta horren baitan kokatu dute gaurko eskaera. Hain zuzen ere, aipatutako programa Integrando Fundazioak eskaintzen du.
Formakuntza plana -kontrataziorako konpromisoa eta Lanbide eta Eusko Jaurlaritzak ziurtatutako titulazio ofiziala eskaintzen duena- Eraikin eta Lokalen garbiketan trebatzeko kurtso batean datza, emakumeei soilik zuzendua.
LAB, ELA, UGT, CCOO eta ESK sindikatuok mota honetako programek genero estereotipoak berretsi egiten dituztela salatu dugu. Emakumeen curriculumak garbiketa zerbitzua eskaintzera zuzenduak egotea genero rolak eta lanaren banaketa sexuala betikotzera laguntzen dute.
Bizkaiko Foru Aldundiak lan merkatuaren eredu diskriminatzaile bat bultzatzen ari da, non langileen posizio soziala eurek duten generoaren arabera ezartzen den. Horrela, emakumeei ogibide espezifiko batzuk esleitzen zaizkie: garbiketa eta zaintza-lanak, kasu; partzialitateak gogor jo eta soldatak bereziki baxuak diren sektoreak, alegia. Administrazioak, publikatzen dituzten programei dagokionez erantzukizunez jokatzeaz gain, egiten duten ahaleginarekin egunero pairatzen dugun genero-arrakala iraultzeko eredugarri izan beharko lirateke, eta ez da horrela gertatzen.
Beraz, formakuntza eskaintza honen zuzenketa eta berau modu zuzen eta inork diskriminatu gabe argitara dadila exijitzen dugu.