Osakidetzak eta Mutualiak lankidetza-hitzarmen bat sinatu dute, bi erakundeetako medikuek bi zerbitzuetatik laguntza jasotzen duten pertsonen espediente eta historia klinikoetara zuzenean sartzeko aukera izan dezaten. Hitzarmen honen bidez, eta tresna eta aplikazio informatikoak erabiliz, mutualitateetako osasun-langileek beren pazienteen historia klinikoak ezagutzeko aukera izango dute, haien aurrekariak, jasotzen ari diren tratamenduak, analisiak, proba diagnostikoak eta abar ezagutzeko. Baina, dirudienez, ez da soilik informazioa eskuratzea izango, baizik eta bi erakundeetatik informazio berria sartu ahal izatea artatutako pertsonen espedienteetan eta historia klinikoetan. Teorian, pazienteen berariazko baimenarekin.
Hobekuntza gisa saltzen zaigu hori, oso larria eta arriskutsua iruditzen zaigu osasun-sistematik kanpoko profesionalek osasun-sistemara sartzea. Horrek urratu egiten du Osakidetzaren osasun-sistema publikoaren erabiltzaile gisa datu medikoak isilpean gordetzeko eskubidea, eta kalte larria egin diezaioke osasun-sistema publikoko paziente-mediku harremanari, gerta baitaiteke haien historia medikoan jasota geratzea nahi ez izatea lan-munduan sortzen dituzten arreta edo kalteak.
Bada, Gasteizko Legebiltzarrean izan gara, Lan Osasuneko kide Inko Iriarteren eskutik, Jaurlaritzak langileen datu medikuak Mutualiari oparitu dizkiola salatzeko. Hain zuzen ere, agerraldian dei egin diogu langile klaseari Mutualiari aurrez baimenik eman ez diezaion, ez espreski, ezta idatziz ere, langileen txostenetara modu zuzenean sartu ahal izateko Gizarte Segurantzak mutualitateari legez esleitutako edozein lankidetza arlotan; hala nola, lan istripuen eta lanbide gaixotasunen kontingentzietan, kontingentzia arruntak eragindako aldi baterako ezintasunean, haurdunaldiko eta edoskitze naturaleko arriskuetan, minbizia edo beste gaixotasun larriren bat duten adingabeen zaintzan…
Era berean, dei egin diegu langileei ez diezaiotela Mutualiari Osakidetzako historia klinikoan sartzeko aurrez baimenik eman, ez espreski, ezta idatziz ere. “Ez sinatu. Ez entregatu zure historia klinikoa mutualiari”, salatu dugu.
