2024-2026 iraunaldia izango duen akordioak ez die erantzuten sektoreko langileen benetako beharrei, eta ez ditu behar bezala jasotzen negoziazioan planteatutako aldarrikapenak.
Hitzarmena sinatu eta argitaratzen denerako, amaitzear egongo da aipatutako hitzarmenaren indarraldia; izan ere, 2026ko abenduaren 31n amaituko da. Gainera, LABen uste dugu hitzarmenaren edukiak motz geratzen direla eta ez dakarrela sektoreko lan-baldintzak duintzen dituen benetako aurrerapausorik.
Urteko lanaldia 2026an 5 ordu baino ez da murrizten, eta 1.726 ordutan geldituko da. Kopuru hori oso urrun dago LABek defendatutako aldarrikapenetatik eta kontziliazio hobea eta lan-baldintza duinagoak lortzeko benetako beharretik.
Zaharkituta geratu ziren lanbide-kategoriak ezabatu dira, eta hori urrats positiboa da. Hala ere, salatzen dugu oraindik ere badaudela prekarizatutako kategoriak. Hiru urtetan KPIaren igoera sinatu da. Hala ere, kategoria batzuetan soldatak gure gutxieneko soldataren aldarrikapenetik behera gelditzen dira.
Garraio-plusaren hobekuntza positiboki baloratzen dugu LABen; izan ere, sindikatuaren aldarrikapenetik atera da. Hala ere, ezin dugu onartu hobekuntza honen aplikazioa hitzarmenaren publikazioarekin lotuta egotea; hau da, Gipuzkoako Aldizkari Ofizialean publikatzen denean hasiko da aplikatzen. Ondo bidean, 2026ko udaren ondoren.
Sinadura hau berandu dator eta ez die sektorearen beharrei erantzuten. LABetik lanean eta borrokan jarraituko dugu lan-baldintzak benetan hobetuko dituen, lanaldia nabarmen murriztuko duen eta Gipuzkoako Pastelgintza eta Gozogintzan oraindik dagoen prekarietatea amaituko duen hitzarmen baten alde.