Ipar Hegoa Fundazioak eta Euskal Herriko Unibertsitateko Parte Hartuz Ikerketa Taldeak "Euskal estatua irudikatzen. Euskal Estatuaren aurreko iritziak eta jarrerak Euskal Herrian" azterketa kuantitatiboa eta kualitatiboa aurkeztu dute gaur Bilbon. 2012an, "Euskal Estatuari bidea zabaltzen", Euskal Estatuak Europan duen bideragarritasuna aztertzen duen liburuarekin hasitako biderari jarraituz, eta Eskozian eta Katalunian gertatu diren independentzia prozesuak abiapuntu hartuta jaio da lan berri hau.
Azken bi urteetan Parte Hartuz Ikerketa taldea (UPV/EHU) eta Ipar Hegoa Fundazioa elkarlanean aritu dira Euskal Herriko biztanleek balizko Euskal Estatu baten aurrean zer jarrera izango luketen aztertzeko. Emaitza askoren artean nabarmendu dezakegu etorkizun politikoa erabakitzeko galdeketa egitearen alde daudela euskal herritarren bi heren.
Lanak lau azterketa biltzen ditu:
Azterketa kuantitatiboa: Euskal Herri osoan Euskal Estatuari buruz egindako inkesta bateko datuak erabiliz.
Azterketa kualitatiboa: Euskal Herri osoan Euskal Estatuari buruz hitz egiteko antolatu ziren eztabaida taldeetako iritziak erabiliz.
Kasu azterketa: Euskal Estatuaren alde dauden enpresaburuen iritziak eta arrazoiak jarrera hori izateko.
Kasu azterketa: euskara eta euskal kultura kontuan harturik, Euskal Estatuaren aurrean Euskalgintzako eragileek izan ditzaketen jarrera eta iritziak.
