Nafarroako zahar egoitzen lehenbiziko hitzarmen sektorialaren aldeko elkarretaratzea egin dugu sindikatuok Iruñean, arratsaldean aurreikusitako negoziazio mahaiaren harira, patronalaren eta Nafarrroako Gobernuaren artekoa.
LAB, ELA, UGT eta CCOO sindikatuon oharra, mobilizazioa dela eta:
Joan den maiatzaren 18an Nafarroako Hirugarren Adinekoen Zentroen lehen sektoreko hitzarmenaren negoziazio-mahaia eratu zen. Uda igaro da eta negoziazio horretan ezin izan da aurrera egin ia ezer ez.
Gaur, helburu argi batekin kontzentratzen gara. Foru Komunitatean zehar 70 zentro baino gehiagotan banatutako 4.500 langile baino gehiagok uste dugu ezinbestekoa dela berehala gure hitzarmen kolektiboaren negoziazioari bultzada bat ematea gure lan-baldintzak eta zerbitzuaren kalitatea ahalik eta azkarren hobetzeko.
Joan den maiatzaren 25ean, sektoreko langileen 1.500 sinadura baino gehiago aurkeztu genizkion Nafarroako Gobernuari zuzeneko erantzukizuna baitu Gobernuak. Sinadura horiek langileen konpromisoa eta aldarrikapena erakusten dute Nafarroako hitzarmen propioa lortzeko eta horrela prekarietatetik urruntzeko.
Une honetan, Nafarroan, kudeaketa pribatuko enpresen esku daude zaintza profesionalizatuak, onura ekonomikoa lehenesten baitute pertsonen zaintzaren gainetik. Beharrezkoa da eredu publiko, doako eta unibertsal baterantz igarotzea esparru honetan.
Batez ere emakumeei dagokien zaintza-lana duindu behar dugu eta lortu nahi dugun hitzarmen kolektiboa, prozesu horretan, aurrerapausoa izango da langileei dagozkien eskubideak emateko.
Negoziazio-mahaian dauden LAB, ELA, UGT eta CCOO sindikatuek enpresaburuei eta Nafarroako Gobernuari eskatzen diegu benetako bultzada eman diezaiotela sektoreko hitzarmen kolektibo honen negoziazioari. Era berean, eskatzen diegu ahaleginak egin beharko luketela sektoreko langileen lan-baldintzak eta zerbitzua bera hobetzen amaituko duen negoziazioa bizkortzeko, horrek eragina izango baitu gure adinekoei ematen zaien laguntzaren kalitatean.