Covid-19ko pandemia egoera honetan, lantokietan langileen osasuna defendatzea lehentasunezkoa da LAB sindikatuarentzat. Hartara, sindikatuaren uste irmoa da enpresek ziurtatu behar dutela langileak koronavirusaren aurrean babestuta daudela.

Joan den ostiralean (martxoak 13) Manu Aierdi Garapen Ekonomikorako kontseilariarekin izandako bileran, LAB sindikatuak lan osasunaren arloko jarraibide zehatzak exijitu zituen, lantokian berehala ezartzeko. NOPLIk (Nafarroako Osasun Publikoaren eta Lan Osasunaren Institutua) erantzun positiboa eman dio LABen eskakizun horri eta martxoaren 17an argitaratu zituen neurriok. Ondorioz, enpresa guztietan eskatuko dugu "prebentzio-zerbitzuek" bete ditzatela NOPLI-k emandako gomendio guzti-guztiak. Ez dugu onartuko erantzukizun hori langileena izatea, eta, beraz, neurri horiek praktikan betetzean eta horien ondorioetan irmo izateko eskatzen diogu NOPLI-ri, hark Lan Ikuskaritzari ez-betetzeengatik ezar daitezkeen zehapenak ikuskatzeko eta betearazteko eska diezaion.

Prebentzio-zerbitzuek langile guztiak informatu behar dituzte, esposizio-arriskua ebaluatu behar dute eta lanpostu bakoitzerako prebentzio-neurri egokiak ezarri behar dituzte. Eta langileek segurtasun-neurri egokiak bermatuta ez badituzte, eta osasuna arriskuan jartzen ari baira, lana geldiarazteko prozedurari ekingo diogu.

Herritarrak bakartzeko eta konfinatzeko neurri zorrotzak hartzen diren bitartean (eguneko 24 orduetan etxean egoten), gure osasuna babesteko eta Covid-19ren hedapena geldiarazteko neurri eraginkorrago gisa, milaka pertsona lanera bidaltzeak ez du inolako zentzurik, eta onartezina da, haien eta gainerakoen osasuna arriskuan jartzen baitu. Lehenik eta behin, gure osasuna. Eta hori bermatzen ez bada, ezin da lan egin.