2024-06-18
HomeIndustriaFederazioaProdukzioa langileen osasunaren gainetik jartzen ari direla salatu dugu

Produkzioa langileen osasunaren gainetik jartzen ari direla salatu dugu

Norbaitek azaldu beharko liguke auto baten produkzioa edo horrelako aktibitateak zergatik diren gure osasuna baino garrantzitsuagoak batzuentzako. Espainia zein Frantziako Gobernuek, baita Nafar zein Gasteizko Gobernuek berme gehiago eskaintzen diote produkzioa mantentzeari, langileon osasuna bermatzeari baino.

Berriro ere langile klasea da irakasgaiak ematen ari dena; lan zentroak gelditzen ari gara. Volkswagen, Aernova, Mercedes edota CAF-ek produkzioa eten dute. Milaka dira dagoeneko etxean berrogeialdia zintzo betetzen ari direnak, ez beraiek ezta ingurukoak ere ez kutsatzeko ariketa soziala eginda.

Hala ere, baditugu TUBACEX edota SIDENOR bezalako kasuak. Enpresak produkzioa du helburu, eta Jaurlaritzaren eta Lan Ikuskaritzaren babes osoarekin; langileak “salduta” utzi dituzte. Koronabirusaren izurritea, kutsatze maila eta erraztasuna, eta datu larri guztiak mahai gainean edukita ere; produzitzen jarraitzeko agindua dute langileek. Langileen plantoak indargabetu eta lanera itzultzeko agindua jaso dute.

Ehunka langile dauden lan zentro batean NORK eta NOLA berma ditzake beharrezko diren prebentzio neurri guztiak? Eusko Jaurlaritzaren eta Osalanen aholkuak lotsagarriak dira, ez dute prebentzioa helburu, produkzioa mantentzea besterik ez dute bermatzen.

– Zeintzuk dira sarrera / irteeretan beharrezko neurriak? Zenbatero eta nork garbitu eta desinfektatu behar ditu gune komunak (aldagelak, komunak…)? Nork eta zenbatero desinfektatu behar ditu lan tresna eta makina komunak? Nola bermatuko da langileen artean uneoro 1,5m distantzia errespetatuko dela?

– Eta, txarrenean jarrita, langile bat lan zentroan gaixotuz gero hilko balitz, noren erantzukizuna izango da? Zer esango dute Tapiak eta Confebaskek, ezin dela frogatu non gaixotu den?

Ez da txorakerietarako unea! Ez da etekin ekonomikoen eta kapitalaren mesedetan jarduteko unea! Ez da onargarria jendarte osoa konfinatua dagoenean, kapitalari eta enpresei nahieran ibiltzen uztea! Martxoaren 7an Arantxa Tapiak esan zuen “enpresak ixtea larregi zela, ez dagoela arriskurik”; Utzi Confebasken esanetara aritzeari Arantxa! Alarma egoeran gaude! Jendarte osoaren osasuna jarri behar dugu erdigunean; langileon unea da!

LABetik Eusko Jaurlaritza eta Nafar Gobernuei, berehala, oinarrizko ez diren jardun ekonomiko guztiak eteteko eskatzen diogu. LABetik langileen Osasuna erdigunean izango duen politika egiteko unea dela aldarrikatzen dugu.

Bukatzeko, gure elkartasuna eta harrotasuna plantoa egin duzuen eta egiten ari zareten langile guztioi. Gobernuburuak ez daukaten koherentzia, zuek demostratzen ari zaretelako. Gure bizitzek hutsaren hurrena balio dutela esan digutenean, zutitu eta aski da esan duzuelako! Eutsi!
 

 

 

AZKEN ALBISTEAK | ÚLTIMAS NOTICIAS

Nafarroako etxebizitzen alokairuari buruzko datuek erakusten dute premiazkoa dela gaia legez arautzea eta parke publikoa zabaltzeko konpromiso handiagoa hartzea

Iragan ortziralean Nafarroako Estatistika Institutuak Etxebizitza alokatzeari buruzko estatistika argitaratu zuen. LAB sindikatuaren iritziz, ikerketa horrek berresten du merkatuak ez duela alokairuaren prezioa behar bezala erregulatzen eta premiazkoa dela lege eta administrazio neurriak hartzea. Azterlan horren arabera, alokairuaren hileko batez bertzeko prezioa 541,6 eurokoa da, baina azterketak berak onartzen du datu horrek ez duela islatzen alokairuko etxebizitza bat eskuratzeko prezio erreala, etxebizitza librearen prezioa askoz ere garestiagoa baita.

Gernikako Ospitalean erizainen eta erizaintzako laguntzaileak falta direla eta egoera kritikoa dela salatu dugu

Larrialdietako paziente kritikoei arreta ematean, triajean eta boxetan dauden pazienteen segurtasuna arriskuan jartzen da.

Eskola garraioaren hitzarmena desblokea dezatela exijitzeko mobilizazioa egin dugu

Kolektibitateen sektoreko patronalaren enpresetako bat den Eulenen aurrean izan da elkarretaratzea, Eusko Jaurlaritzako Hezkuntza Sailaren mendeko ikastetxeetako eskola-garraioko eta jolastokiko zaintzaileen hitzarmen kolektiboaren negoziazioaren blokeoa salatzeko.