LAB sindikatuak elkartasuna eta babesa erakutsi nahi dio, gaur Madrilgo Auzitegi Gorenean lekuko bezala deklaratzera deitu duten Kataluniako USTEC sindikatuko kide eta “Escoles Obertes” plataformako bozeramaile den Ramon Font-i. Horrela, Maider Izagirre irakaskuntzako arduraduna eta Koldo Saenz nazioarteko arduradunak buru izan dituen LABen ordezkaritza bat Madrilen dago gaur, epaiketan jarraitzen.

Ramon Font-i gure elkartasuna adierazteaz gain, Madrilen Kataluniako independentismoaren eta herrien erabakitzeko eskubidearen kontra egiten ari diren epaiketa gaitzetsi eta epaituak izaten ari direnei gure elkartasun osoa adierazi nahi diogu. Epaiketa honetan bere etorkizuna modu demokratikoan erabaki nahi duen Kataluniako herriaren gehiengo bat epaitzeaz gain, herrien autodeterminazio eskubidea bera epaitzen ari dira, eta hori onartezina dela deritzogu. Orain Kataluniako herria da estatuaren errepresio bortitza pairatzen ari dena, iraganean Euskal Herrian hainbatetan pairatu genuen bezala, beste behin Estatu espainarraren izaera anti-demokratikoa agerian utziz.

Behin baino gehiagotan adierazi dugu, edozein herriren garapenerako, hezkuntza funtsezko zutabea dela eta hori argi geratu da Katalunian emandako prozesuan eta independentziaren adierazpenean, Espainiako estatuak Kataluniako “Escola” jomugan jarri izan baitu.

Hezkuntzak pertsona kritikoak eta askeak garatu behar ditu, eta bereziki, zapaldutako herrien hizkuntza eta kultura bermatu beharko lituzke, alderdi hauek, herrien biziraupenarekin erabat lotuta baitaude.

Bestetik, lerro hauen bidez gure indar eta babes guztia bidali nahi diegu Kataluniako hezkuntza komunitatea osatzen duten kideei, bereziki langileei, datorren maiatzaren 16an lan baldintzak hobetzeko asmoz, deitu duten greba deialdia dela eta.

Euskal Herrian ere, azken urteetan, lan zentroak hustu eta kalera irten gara lan baldintzak hobetu eta herri honek behar duen benetako hezkuntza publikoa aldarrikatzera. Hezkuntza, jendartearen eraikuntzarako bidean, eraldaketarako tresna bezala ulertzen baitugu eta horretan dihardugu egunero.

Borrokaren balioa azpimarratu nahiko genuke, gobernuaren jarrera mugiezina pitzatzeko balio duelako. Etorkizuneko hezkuntza sistema, langileon lan baldintza duinak jasotzeaz gain, herriaren beharretara egokitu beharko da, eta gainera, ikaslea erdigunean kokatuko du, berau ardatz bilakatuz eta hezkuntza kalitatea bera bermatuz

Gure elkartasuna adierazteaz gain, aurrera jarraitzeko indarra bidaltzen dizuegu. Lanean jarraituko dugu, burujabetza bidean, herri gisa ditugun erronka sozial eta nazionalei erantzuteko, egun Euskal Herriak eta Kataluniak bizi dugun menpekotasuna gainditzeko.

Belaunaldi askeak, langile askeak, herri libreetan!