Hainbat mobilizazioren ostean eta greben bezperan, ELAk aurreakordioa adostu du patronalarekin eta CCOO zein UGTren babesarekin, mahai gainean ere ez zeuden edukien inguruan.
Mobilizazio asko egin ditugu hilabete honetan, eta bi greba deituta genituen martxoaren 27rako eta 30erako, Aste Santua dela eta salmenta handiko egunak baitira. Grebara joateko arrazoiak honako hauek ziren: patronalari presioa egitea benetako KPI bermatzeko, antzinatasuna desizozteko, larunbat libre eta zaintza-lizentzia kopurua handitzea eta urteko lanaldia nabarmen murriztea. Aldiz, ELAren aurreakordioan ez dago aurrerapausorik gai horiei dagokienez.
. Indarraldia: 2023-2025
. Ultraaktibitatea (dagoeneko badugu): Hitzarmen honetan 36 hilabeteko ultraaktibitatea genuen, eta inoiz ez da hainbeste luzatu negoziazioa. LABen mugarik gabekoa defendatzen dugu, baina garrantzia handiko gaiak zeuden negoziazio batean, kontuan hartuta hitzarmen hau urtez urte berritzen joan dela, ez dugu ulertzen trukerako txanpona izaterik.
. Hitzarmena ez aplikatzeko klausula (dagoeneko badugu): Hitzarmen honek badu hitzarmena ez aplikatzeko klausula, idazketa bakarrik aldatzen da!
. Lanaldi murrizketa sinbolikoa: Patronalak 3 orduko jaitsiera proposatzen zuen 2024rako eta 2koa 2025rako… eta ELAk beste ordubete jaistea adostu du. Aurreikuspenen arabera, Espainiako gobernuak urteko lanaldia 1.706 ordura jaitsiko du (37,5 ordu astean) 2025ean, eta klausularik ere ez da onartu horrela izanez gero txikiena aplikatuko dela bermatzeko.
. Gaueko lanaren plusa: 150 €.
. Lan egutegian sartzea 4 larunbatak: Merkataritzan ordutegiak oso zailak egiten dira kontziliatzeko, eta zentzu honetan, bizitza, denbora eta zaintza zentroan jarri nahi ditugu. Horregatik, LABek bi larunbat gehiago eta medikuarengana laguntzeko ordu ordainduak eskatzen genituen. Larunbatak lan-egutegian antolatzea, ia inork urteko egutegirik ez duen eta 4ak ere gozatzen ez dituen sektore batean ez da hobekuntza bat, promesa hutsala baizik eta hori hitzarmen bat sinatzeko argudiatzea, lotsagarria da.
. Benetako KPIrik gabeko soldata-igoera, zeinetan guk aldea ordaintzen dugun:
– 2023: % 3,5 (% 5,8 beharrean)
– 2024: % 3,1
– 2025: % 2 (KPIrik gabe)
2023ko urtarriletik aurrerako atzerapenak eta 2023-2025 metatutako KPIaren berrikuspena: metatutako KPIa handiagoa balitz, aldea 2026ko urtarrilean aplikatuko litzateke, baina atzerapenik gabe.
Ez dugu iritzi aldaketa hau ulertzen, enpresak emaitza errekorrak izaten ari diren testuinguru batean, grebek mahaian gure posizioak indartu behar zituztenean. Hitzarmen honen eguneraketa ezin da erosteko ahalmena bermatzen ez duten soldata-igoeretara mugatu, hori baita, funtsean, akordio honek egiten duena, gure baldintzak hobetzen joatea behar dugu: antzinatasuna desizoztea, larunbaten kopurua handitzea, medikuarengana joateko orduak, nagusitzen joan ahala lanpostu-aldaketetarako bermeak, lanaldia murriztea…