Gaur hasi eta maiatzaren 20ra arte hainbat mobilizazio egingo ditu Indesa 2010 SL Enplegu Zentro Bereziko enpresa batzordeak, hitzarmen duina helburu. Gaur goizean Gasteizko Probintzia plazan egindako elkarretaratzea izan da lehenengo hitzordua. Amaitzeko, larunbatean, hilak 20, manifestazioa deitu dute.
Indesa 2010eko langileek ia lau urte daramatzate negoziaketekin, ezer gutxi aurreratu gabe. Horren arrazoia, hein handi batean, Lanpostuen Balorazioaren Txostena da, zuzendaritzaren gertuko enpresa batek egina eta Indesa 2010 Slko administrazio kontseiluak aldebakarrez onartua. Bada, txosten horrek, besteak beste, lanbidearteko gutxieneko soldataren azpitik dagoen oinarrizko ordainsaria jasotzera kondenatzen ditu ia 200 lankide. Kide horiek errendimendu baxuko kontratuak dituzte, eta %100eko lansaioan jardun arren, gutxienekoaren azpitik dauden soldatak jasotzen dituzte.
Lanbidearteko gutxieneko soldata igotzen da eta kategoria baxuenetako soldatak teilakatu egiten dira. Aldiz, KPIa izugarri igotzen da eta haiek ez dute ezertxo ere egiten, ditxosozko txostena ukitu ere ezin delako egin.
Langileek urteko lan orduak (gaur egun 1633) gutxitzeko eskatzen dute, langile publikoak direla aldarrikatuta. Era berean, antzinatasuna kobratzeko eskubidea bezalako beste zenbait aldarrikapen dituzte.
Bestalde, promozioen batzordea sortzea ere ezinbestekotzat jo dute beharginek, eta beren hitza kontuan har dadila, bereziki apetaz egindako kontratazioak saiheste aldera.
Horregatik guztiagatik atera dira gaur kalera, eta datozen egunetan ere hala egiten jarraituko dute. Honako hauek dira bihartik aurrera antolatu dituzten hitzorduak:
- Maiatzak 17, asteazkena, 10:30ean Jundizko garbitegiaren atean, langileen atsedenaldian.
- Maiatzak 18, osteguna, 17:00etan Batzar Nagusietan. Enpresa batzordearen elkarretaratzea.
- Maiatzak 20, larunbata, 12:00etan Probintzia plazatik abiatuta: manifestazioa.
