2024-09-19
HomeEkintza SindikalaEAEko Mahai Orokorrean zaharrak berri: enpleguaren eta zerbitzu publikoak hobetu baino, atzeraka...

EAEko Mahai Orokorrean zaharrak berri: enpleguaren eta zerbitzu publikoak hobetu baino, atzeraka jarraitzen dugu

Betiko moduan, astelehenean izandako EAEko Funtzio Publikoaren Mahai Orokorraren bilera tramite huts bezala amaitu zen. Administrazioaren aldetik negoziazio egutegi bat proposatu bada ere, ez du LABentzat lehentasunezkoak diren gaiak jaso, ezta konpromisorako erantzun bat jaso ere, urteak daramagun bezala. 

Errelebu kontratuaren proposamenari dagokionez, duela bi urteko proposamena berarekin jarraitzen dugu eta orduko balorazioa errepikatzen dugu: soilik langile finkoenzat; legearen aplikazio husa; errelebistaren kontratua behin-behinekoa eta partziala izan daiteke, eta ez da bermatzen lanpostuak ez direla desagertuko. Administrazioak ez du proposamena negoziatzen jarraitzeko asmorik adierazi, eta LABek erantzukizunagatik ezin du proposamen mugatu hau sinatu.

Madrilen irizpideen araberako soldata igoera proposamena bere horretan ez du onartzen LABek, eta berriro ere 2010eko taulak berreskuratzeko plan bat adostea proposatu dugu. Jaurlaritzaren borondatea da behar dena.

Negoziazioaren lehentasuna enplegua izan behar da, ezkutukoa azaleratu, gehiago sortu eta egonkortu, eta egindako murrizketak atzera botatzea. Eusko Jaurlaritzak enplegu plan bat negoziatzeari eta murrizketak itzultzeko aldarrikapenari uko egitea eskatzen digu “negoziazioan aurreratzeko” aitzakiapean.

Argi gelditu da Gobernuaren borondate falta, izan ere borondaterik balego, kontsolidaziorako eta enplegurako lege propioak prestatuko lituzke parlamentuak onartzeko eta aurrera ateratzeko. Bere jarduera eta asmoa hitzen kontrako bidean doa: auzolana delakoarekin ahoa bete, baina arrabola erabiliz negoziazio kolektiboa ukatu eta langileok bilera antzuetan denbora galtzen eduki nahi gaitu.

Enplegu publikoa sustatzeko eta egonkortzeko Eusko Jaurlaritzaren borondatea behartu beharra dugu beraz, mobilizatzen jarraitu behar dugu. Efektismo eta irudi hutsak sahiestuz, ezinbestez egonkorra izan behar duen enplegu publiko duinaren alde aktibatu behar gara langile guztiok. LABek mobilizazioak sustatzen jarraituko du, guztion elkarlana lehenetsiz.

AZKEN ALBISTEAK | ÚLTIMAS NOTICIAS

Bilboko hiribilduaren mantentze elektrikoari buruzko agiri teknikoa inpugnatu dugu, hitzarmena ez betetzeagatik

2024ko irailaren 4an, Bilboko Udalak argitara eman zituen Bilboko argiteria publikoaren eta instalazio elektriko eta osagarrien mantentze- eta kontserbazio-zerbitzuaren lizitazio berriaren agiri teknikoak. Agiri horietan, Bilboko Argiakeko 39 langile agertzen dira langile subrogagarri gisa, eta subrogazio-zerrendatik kanpo geratzen dira mantentze elektrikoko zerbitzuko obren atalari atxikitako 9 pertsonak.

Karrera profesionala guztiontzat exijitu dugu

Sindikatuak Nafarroako Parlamentuaren aurrean elkarretaratzea egin du gaur goizean helburu bikoitz bati jarraiki: batetik, ateez bestaldean izenpetu behar zen akordioa ospatzeko, zeinaren bitartez Osasunbideko 3.000 langile baino gehiagorentzako karrera profesionala onartuko baita; eta bestetik, eskubide hori bera gainerako langileentzat ere zabal dadila aldarrikatzeko. Egun historikoa dela nabarmendu dute, borroka sindikalaren beharra eta garrantzia azpimarratzearekin batera.

Pentsioen inguruko akordio berriak erretiro adina atzeratzen du eta pauso berri bat suposatzen du gizarte segurantzaren pribatizaziorantz

Gaur, Pedro Sanchez buru dutela, sinatu dute CCOO eta UGT sindikatuek eta CEOE eta Cepyme patronalek pentsioen alorrean adostutako akordio sozial berria. Akordio hori estatu-mailan egin da, eta legezko adina eta kotizazio-urteak igotzen jarraitzea du helburu, erretiro adina atzeratzea sustatuz. LABen uste dugu akordio honek ez diela erantzuten euskal gehiengo sindikalak eta Euskal Herriko Pentsiodunen Mugimenduak aurkeztutako premiazko eskaerei. Aitzitik, Espainiako Gobernuak aurrera egiten du Bruselatik garatutako politika neoliberaletan, betiere patronala babesten duten sindikatuen bermearekin.