2024-06-24
HomeEkintza SindikalaEAEko Justizia Auzitegi Nagusiak arrazoia eman digu, eta Erandioko Gestamp Try Out...

EAEko Justizia Auzitegi Nagusiak arrazoia eman digu, eta Erandioko Gestamp Try Out enpresan langileak legez kanpo laga direla adierazi du

Euskal Autonomia Erkidegoko Justizia Auzitegi Nagusiak ezetsi egin du Gestamp Taldeak jarritako errekurtsoa. Horrenbestez, Erandion kokatuta dagoen Gestamp Try Out (GTO) enpresan langileak legez kanpo laga direla adierazi du, LABi arrazoia emanez.

Gestampen itxikeriak eta zikoizkeriak eragin dute egoera hori. Urteak daramatzagu borrokan GTOko langileek GTEn jasaten duten legez kanpoko lagapena salatzen. Arrazoia eman zigun Lan Ikuskaritzak; 8 aldiz eman ziguten arrazoia Bilboko lan-arloko epaitegiek; eta orain, arrazoia eman digu EAEko Auzitegi Nagusiak.

Ez gara nekatu GTOko langileen lan-baldintzen urraketa sistematikoa salatzeaz. Legez kanpoko lagapenaren bidez, eskulan merke bihurtu dituzte, bigarren mailako langile.

Argi dago Gestampen plan bakarra lan-baldintzak “estutzea” dela, xantaiaren, mehatxuaren eta etengabeko beldurraren bidez. Eta hori guztia Eusko Jaurlaritzaren oniritziarekin, enplegua suntsitzen eta langileen eskubideak urratzen dituen enpresa bati laguntza publikoak ematen jarraitzen baitu. Non dago laguntza publikoen kontrola eta jarraipena? Enpresa pribatuei diru publikoa ematen jarraituko duzue, trukean konpromiso sozialik exijitu gabe? Alfonbra gorria jartzen jarraituko duzue gutxi batzuek aberasten jarrai dezaten langileen kontura, ala benetan zerbait egingo duzue horren inguruan?

Epai hau GTOko langileek lan-baldintzen defentsan egindako borrokaren eta izandako determinazioaren emaitza da. Hau ez da bidearen amaiera, baizik eta haien eskubideak onar ditzaten borrokan jarraitzeko gasolina. Horregatik, epai honek bizi duten egoera salatzen jarraitzeko, enpresaren zigorgabetasunarekin amaitzeko eta gure eskubideak konkistatzen jarraitzekoko balio behar digu.

Gestampi eskatzen diogu epaia onartzeko eta talde barruko langileen legez kanpoko lagapenarekin amaitzeko.

Gestampeko langileen legez kontrako lagapenari ez.

Borroka da bidea.

AZKEN ALBISTEAK | ÚLTIMAS NOTICIAS

Espainiar Estatuko langile publikoentzako soldata igoera inposatua da eta erosahalmenaren galeran sakontzen du Hego Euskal Herriko langileentzat

LABen ez dugu ontzat ematen bihar Espainiako Gobernuko Ministro Kontseiluak Estatu osoko langile publikoentzako (*) onartuko duen %2ko igoera gehi %0.5eko baldintzatutako gehigarria.

Zumarragako posta zerbitzuaren egoera onartezina da

Plantillari dagokionez, lanpostu huts ugari daude; adibide gisa, goizeko txandako langileen egoera; izan ere, egun batzuetan 5 pertsona baino ez daude bete beharreko 13 lanpostutarako, hau da, % 62 ez da betetzen. Zoritxarrez, egoera hori oso ohikoa da lantoki honetan. Plantillak hainbat elkarretaratze egin ditu langile-falta salatzeko, baina arazoa ez da hobetzen hauteskunde-aldiaren ondoren, eta enpresak ez du inolako asmorik kontrataziorik egiteko. Uztailaren 7an oporraldian sartuko gara eta oporretara joango diren langileak inork ez dituela ordezkatuko aurreikusten da.

Nafarroako Zurgintzako hitzarmena sinatu dugu, eskubideetan aurrerapenak baititu eta erosteko ahalmenari eusten baitio

Gaur goizean LAB sindikatuak Zurgintza sektoreko Nafarroako hitzarmena sinatu du, 2023 eta 2025 urte bitarteko indarraldia izanen duena. Hitzarmen honek eskubideak handituko ditue eta langileen erosteko ahalmenari eutsiko dio; nahiz eta negoziazioak iraun bitartean patronala behin eta berriz saiatu den lan baldintzak okerragotzen praktiketako kontratuen soldatak txarragotzeko edo soldata igoera KPItik aldentzeko bezalako neurriekin.