Hezkuntzak 2017rako lan eskaintza deialdia presaka, planifikazio barik eta legeak baimentzen duen azken momentuan onartzeko asmoa du. Ikasturte hasieran, irailaren 7an, Cristina Uriartek Lanbide Heziketarako lan eskaintza izango zela iragarri zuen komunikabideetan. Ordutik hona, hainbat aldiz informazioa eskatu badugu ere, kezkatzeko moduko erantzunak jaso ditugu Hezkuntza Sailetik. Duela gutxi arte ez dute inolako informaziorik izan. Ez kidegoa, ez plaza kopurua, ezta oposaketak egongo ziren ere ez zekiten. Horregatik oposaketak atzeratzea eskatu dugu.
Irakasleok jakin badakigu oposaketa batek zer nolako eragina duen langileongan eta zentroetan ere. Zenbat lan eta zenbat denbora eskatzen duen halako prozesu batean parte hartzeak. Lan eskaintzaren berri momentu honetan jasotzea erasotzat hartzen dugu. Gutxiengo baldintza batzuk ukaezinak dira. Abenduaren azken astean informazioa jasotzea onartezina da.
Hezkuntzako beharren araberako planifikazioa beharrezkoa da. Plantillaren adina eta jubilazioak, langileen %30tik gorako behin-behinekotasun tasa eta eskoletako plantillen egoera eta egonkortasun falta kontuan hartu eta kalitatea bermatuko duen kontratazio eta sarbide eredua planifikatu behar da. Egungo eredua aldatzearen beharra ere azpimarratu du ere Europako sententziak. Azken urteetako oposaketa deialdiek egungo egoera betikotu egiten dute, inolako planifikaziorik gabeko erabakien ondorio dira, unean uneko erabakien ondorio.
Horregatik guztiagatik, honakoa eskatzen dugu:
- 2017rako lan eskaintza bertan behera uztea.
- Aurreikusita dauden lanpostu horiek ondorengo deialdirako gordetzea. Langileek beharrezko denboraz, duintasunez aurkezteko denbora izan dezaten.
- Mahai tekniko bat irekitzea. Egungo egoeraren azterketa egin eta etorkizunera begira hezkuntzako beharrei eta langileen beharrei erantzungo dion kontratazio eta sarbide eredua planifikatzeko.