Eusko Jaurlaritza ikasturte honetan egiten ari den ikastetxeetako garbitzaileen kontratazioaren prekarietatea eta covid-19ari aurre egiteko aplikatu beharreko prebentzio-neurri ez nahikoak salatzen ditu LAB sindikatuak. Covid-errefortzuak egiteko jardun osoko kontratuak egin beharrean 4 orduko kontratazioak egin ditu. Hau da, oso feminizatu eta prekarioa izan ohi den langile-kolektibo honen lan-baldintzak okertu ditu, nahiz eta kontratu hauek covid-19aren aurkako neurri osagarri moduan saldu nahi izan dituen Hezkuntza Sailak.

Behin eta berriz azaldu dugunez, pandemiak sortu duen egoeraren aurrean, kalitatezko aurrez aurreko hezkuntza itzulera segurua bermatzeko baliabide material gehigarriak eta pertsonal gehiago kontratatzea ezinbestekoa da. Horri erantzunez, Jokin Bildarratzek gidatzen duen Hezkuntza Sailak 4 ordutako errefortzu-kontratuak egin dituela jakin dugu, ikasturtero lan-metaketengatik egiten diren laguntza-kontratuei gehituko zaizkienak. Kontratazio hauek, ordea, ohi bezala bederatzi hilabeteko iraupena izan ordez, ikastetxea zabalik mantendu bitartean soilik iraungo dute, eta covid-19agatik ikastetxea itxiko balitz bertan behera geratuko lirateke. Horren atzetik balizko eskola-itxiera izatearen eszenatoki batean kontrataturiko jendea ez izateko asmoa legoke; hau da, oso prekarizaturiko langile-kolektibo horren lan-baldintzak duintzea baino, irizpide ekonomizistek gidatu dute kontratazio berri hori. Langile hauek funtsezkoak bilakatu ziren eskolak itxi zirenean eta ikasturte hasieran ere bitartekorik gabe martxan hasi dira, ratio gehiegirekin, eta langileen profesionaltasuna zein zerbitzua aurrera ateratzeko nahiei esker aurrera eramanda. Orain ere, lau ordutako kontratazio horiek ez diote ikastetxez ikastetxe egin behar zen premien azterketari erantzuten, eta leku askotan eznahikoak izan daitezke.

Bestalde, hartu diren prebentzio-neurriak sindikatuekin adostu gabe argitaratu dituzte, funtzioak eta lan-zama handitu egin dira eta, besteak beste, ez dira jasotzen langile hauen aldageletarako neurririk, atsedenak hartzeko tarterik, lana amaitzerakoan dutxa hartzeko eskubidea, zein laneko arropetan izan behar diren neurriak. Gainera, ez da ezartzen ikastetxe guztietan egon behar den balizko gaixoak isolatzeko covid gela garbitzeko neurri espezifikorik, ezta langileen babesteko ekipamendu berezirik.

Ziurgabetasun egoera honen aurrean, oso mezu argia helarazi nahi diogu Jaurlaritzari: ikastetxe bakoitzeko beharrei egokituko zaien kontratazioa eskatzen du egoerak, eta ez gehien bat emakumeek osatzen duten langile-kolektiboaren prekarietatean sakontzen duena. Frogaturik geratu denez, garbiketa funtsezko zerbitzua da covid- 19ari aurre egiteko orduan, eta kontratazioak egiteko irizpidea ezin da izan dirua aurreztea, langile, ikasle eta, oro har, gizartearen osasuna jokoan dago-eta.