Joan den abenduan, EAEko eskola publikoetako jolastokietako zaintzaileen eta eskola garraioko hitzarmen kolektiboaren enpresa-elkarteak (CIDI, Eulen, Ercisa eta La Productora enpresek osatua) negoziazio kolektiboa bertan behera uztea erabaki zuen, Eusko Jaurlaritzako Hezkuntza Sailak zerbitzua berriz lizitatu eta hau esleitu arte.
Erabaki horren ostean, LAB sindikatuak salaketa jarri zuen enpresa-elkartearen aurka, askatasun sindikala urratzeagatik. Bada, EAEko Justizia Auzitegi Nagusiak epaia eman du eta honen arabera, enpresa-elkarteak eta berau osatzen duten enpresek oinarrizko eskubide bat urratu dute; alegia, askatasun sindikalerako eskubidea, negoziatzeari uko egiteagatik. Hori dela eta, enpresa-elkartea kondenatu du eta sektoreko hitzarmen kolektiboaren negoziazioa berehala berrezartzea exijitu dio.
Ez dezagun ahaztu eskola garraioa eta jolastokiko zaintzaileek zerbitzu publikoa eskaintzen dutela eta Eusko Jaurlaritzako Hezkuntza Sailak enpresa pribatuen esku uzten duela bere kudeaketa.
Hau esanda, LAB sindikatuak epaiaren balorazio oso positiboa egiten du eta enpresa-elkarteari negoziazioei berriro ekiteko exijitzen dio.