Goizean langileak eraikinean sartu dira eta eserialdia egin dute zuzendaritzaren bulegoaren aurrean. Hala, bilera baterako hitzordua eskatu dute, bi hilabete eta erdiz greban daramaten honetan, beren aldarrikapenei bide eman behar zaie eta. Hitzarmenaren negoziaketan orain arte jasotako homologazio printzipioa mantentzea da eskakizun nagusietako bat.
Enpresa esleipendunei, Osakidetzari berari nahiz Eusko Jaurlaritzako Osasun Sailburuari interpelatzen jarraitzen dugu Osakidetzako garbiketako borrokaren baitan. Gaurkoan, intersindikaleko langileekin batera Donostia Ospitalera eraman dugu ekintza, eta eserialdiaren bidez haizatu ditugu gure aldarrikapenak beste behin ere.
B hilabete eta erdi dramatzagu dagoeneko gure hitzarmena defendatzeko greban, eta 5 urte igaro dira negoziazio prozesua abiatu zenetik. Bada, Osakidetzako garbiketa-zerbitzuen esleipendun diren enpresekin berrogeita hamar bat bilera eginda ere, negoziazioaren erabateko blokeoa agerikoa da.
Lan-baldintzak Osakidetzako langileen baldintzekin homologatzea helburu duen hitzarmena da. Horiek izan dira, hain zuzen ere, bere garaian inplikatutako hiru alderdiok (enpresak, langileok eta Osakidetza) onartu genituen joko-arauak, eta horien arabera jardun dugu urteetan eta urteetan. Hala ere, enpresak eta Osakidetzako zuzendaritza homologazio-printzipioa hausten ari dira, uko egin baitiote Osakidetzako langileei azken urte hauetan aplikatu zaien gaiak egokitzeari eta aplikatzeari.
Kanpaldiak, manifestazioak, eserialdiak edota errepide mozketak egin izan ditugu denbora honetan guztian, eta argi utzi dugu borrokan jarraitzeko prest gaudela, ez baitugu onartuko atzera-pausorik lan-baldintzetan.
