Jendarte osoa animatu nahi dugu larunbat honetan, hilak 29, arratsaldeko 17:00etan Golem zinemetatik abiatuko den manifestazioan parte hartzera. Nafarroan euskaraz bizitzeko nahia geldiarazi ezin den olatua dela argi utzi behar dugu.

Ezagunak zaizkigu Navarra Suma, hainbat kasutan PSNren laguntzaz, gidatzen ari den saiakera euskarafoboak gure artean izan dituen azken ondorioak.

Mendigorrian, bertako gurasoek eskaera egin arren, Haur eta Lehen Hezkuntzako eskolan euskarazko lerroa sortzeari jarri dizkion oztopoak, Iruñeko haur eskoletan euskarazko eskaintza hutsaren hurrenera mugatzeko saiakerak, unibertsitatean euskaraz ikasteko zailtasun kronikoak… hainbat eta hainbat dira egoera hau onartezina dela ondorioztatzera garamatzaten adibideak.