Pasa den otsailaren 16an, Dbus enpresak Lan poltsa sortzeko deialdia eta hautaketa prozesua arautzen dituen baldintza orokorrak publikatu zituen. Hauen II Eranskinean, honako baldintzak zehatzten dira besteak beste: Garaiera: Honako tarte hauetatik kanpo dagoen garaierarik ez da onartuko: 155 – 200 cm. Hala ere, kasu bakoitza aztertuko da. Oro har, obesitatea (GMI 30etik gorako GMI edo Gorputz Masa Indizea). Beste parametro batzuekin batera aztertuko da, baloratzeko”. LABen baldintza erabat baztertzaileak direla uste dugu. Jakinaren gainean jarri nahi dugu enpresak jarri dituen baldintza hauek interes ekonomiko hutsean oinarritzen direla.

Sindikatuko kideok urte oso bat daramagu autobusen eserlekuen altuera salatzen. Eserlekuak ez dira nahikoa jaisten ezta nahiko igotzen ere. Garaiera altua edo baxua duten langileek arazoak dituzte modu eroso batean gidatu ahal izateko. Fabrikaziotik datorren arazo bat izaki, enpresa eroslea (Dbus) eta enpresa ekoizleekin bildu gara arazoaren berri eman eta konponbideak jarri ditzaten. Baina arrazoia ematen badigute ere, ez dute ezer egiten. Orain, konponbidea aurkitu dute antza, gidarien altuerak mugatzea. Erabat lotsagarria iruditzen zaigu.

Bestetik, gidariek duten GMIa mugatzen duen neurriarekin ez gaude ados. GMI altua izan dezakeen gidari batek ez du zertan osasun arazo bat izan behar. Ez dugu neurri honen zioa ulertzen.

Azkenik, Dbus enpresak deialdi honetarako kanpaina berezi bat jarri du martxan, sektorean emakumeek duten presentzia handitzeko helburuarekin. Hautaketa prozesuan parte hartzera animatzen ditu. Publizitate kanpaina bat besterik ez da. Ez dute emakumeen presentzia handitzeko inolako neurri efektiborik ezarri. LABetik honakoa eskatu diogu enpresari: lan poltsa honetarako emakumeek gordeta izango dituzten lanpostuak deialdiaren %60a izan behar dute. Hau da, beteko diren plaza guztien %60a emakumeek beteko dituztela. Baina ez hori bakarrik, enpresak, instituzio publikoen laguntzarekin, emakumeak formatzeko plan oso bat jarri behar dute martxan, hauen presentzia bermatuko badugu. Hau egiten ez bada, dena itxurakeria besterik ez dela deritzogu.

Dbus-ek azken deialdi honekin inoiz baino baztertzaileagoa dela erakutsi digu. LAB sindikatutik oinarri berriak atera ditzala eskatzen diogu, aurretik aipartutako baldintzak kenduz eta berdintasuna benetan sustatuko duten neurriak barnebiltzen dituela.