LAB sindikatuaren Arabako Correosen duen Atal Sindikaletik salatu nahi dugu Gasteizko banaketa-unitateetan langile falta larria dagoela. Kasu zehatz bat aipatzeko, Salburua edo Arana auzoak banatzen dituen 2. banaketa unitatean, lanpostuen % 50a baino gehiago hutsik dago.
Dauden 27 plazetatik, 14 bete gabe daude: 7 plaza hutsik, baten bat titularrak erretiroa hartu zuenetik bi urte baino gehiago pasa direnean, 3 bajan, 1 desplazamenduan eta 3 baimenarekin. Hori guztia hauteskunde autonomikoen kanpainaren hasieratik hilabete falta denean, eta Errentarena bezalako ezohiko kanpainak datozenean. Horrek lan-karga asko handitzea dakar. Banaketa- unitate hau jarri dugu adibidetzat, baina egoera antzekoa da gainerako guztietan.
Ia 2.000 jakinarazpen daude egiteke, Salburua bezalako auzoek egunak daramatzate gutunen banaketarik izan gabe, hamarnaka pakete daude eramateke. Honek zuzenean eragiten dio milaka gasteiztarri, eta ondorio zuzenak ditu hiritar eta inguru honetako enpresentzat.
Horrek guztiak Posta Zerbitzu Unibertsalaren banaketa kaltetzea suposatzen du eta langileentzako gainkarga bat dakar.
Kalitatezko zerbitzu publiko bat eskatzen dugu, Correosek egin beharrekoa, eta langile nahiko kontratatzea, hiritarren komunikazio postaletarako eskubidea bermatzeko.