2024-06-18
HomeIdazkaritzakBat egiten dugu Kulturatik ekimenak Palestinaren alde deitutako mobilizazioarekin

Bat egiten dugu Kulturatik ekimenak Palestinaren alde deitutako mobilizazioarekin

Igandean Donostian egingo den manifestazioan parte hartzera deitzen dugu, Palestinari elkartasuna adierazi eta genozidioaren bukaera aldarrikatzeko.

Indarkeriaren zurrunbiloa ez da gauza berria Palestinan, azken 75 urteetan etengabea izan da, lurraldearen kolonizazioaren ondorioz eta herritarrei inposatzen zaien apartheid sistema tarteko. Gatazkaren zifrek argi adierazten dute: 5’9 milioi Palestinar errefuxiatu bizi baldintza ankerretara eta erbestera kondenatuak; 5.000 preso politiko baino gehiago, horietarik ehunkada haurrak, zeru zabaleko kontzentrazio eremu handienean, Gazan; 16
urtean Gazaren kontrako etengabeko blokeo eta bonbardaketak; langile palestinarrentzat checkpoint gizagabeak eta lan baldintza prekarioak, esplotazio orokorra; palestinarren lurren lapurreta, eguneroko razziak palestinarren etxeetan, emakume palestinarren bortxaketak nahiz haurren kontrako jazarpenak, eta herri oso baten umiliazioa. Gordina da errealitatea eta bortizkeriaren espirala etengabe elikatzen du.

Pasa den urriaren 7tik hona, palestinarren kontrako genozidioa martxan da Gazan, Estatu Batuen eta Europar Batasunaren konplizitatearekin. Israelek jadanik 30.000 pertsona baino gehiago hil ditu, horietatik 10.000 baino gehiago haurrak. Inpunitate osoz Israel gerra krimenak egiten ari da, genozidio bat “auto-defentsa eskubidea” balitz bezala.

Palestinak elkartasuna eta konponbideak behar ditu. Ezin dugu Palestina bakarrik utzi. Palestinarrek amesteko, bere etorkizuna erabakitzeko, aske izateko eta duintasunez bizitzeko eskubidea dute. Horregatik beranduegi izan baino lehen, Gazan, elkarrizketa eta negoziazioari bide emango dion su-eten bat egon dadila exijitzen dugu.

Nazioarteko komunitateak presio eta eta konponbide mekanismoak aktibatu behar ditu zazpi hamarkada baino gehiago luzatu den okupazioari amaiera emateko. Palestinak bakea nahi du, baina edukiz eta justiziaz beteriko bake bat. Horregatik konponbide integrala izango bada, okupazioaren bukaera, preso eta iheslarien egoerari konponbidea, Gazaren desblokeoa eta palestinarren eskubide nazionalen aitortza barnebildu behar ditu.

LABen norabide honetan gaude lanean; su-etena, genozidioaren bukaera eta Israelen gerra estrategiarekin dagoen konplizitate oro buka dadila exijitzen. Horregatik, Kulturatik ekimenari gure atxikimendua eta babesa helarazi diogu, eta igande honetarako egindako mobilizazio deiarekin bat eginez, Palestinari elkartasuna adierazi eta genozidioaren bukaera aldarrikatuko dugu: martxoaren 17an, eguerdiko 12:30etan Donostian egingo den manifestazioan parte
hartzera deitzen dugu.

AZKEN ALBISTEAK | ÚLTIMAS NOTICIAS

Nafarroako etxebizitzen alokairuari buruzko datuek erakusten dute premiazkoa dela gaia legez arautzea eta parke publikoa zabaltzeko konpromiso handiagoa hartzea

Iragan ortziralean Nafarroako Estatistika Institutuak Etxebizitza alokatzeari buruzko estatistika argitaratu zuen. LAB sindikatuaren iritziz, ikerketa horrek berresten du merkatuak ez duela alokairuaren prezioa behar bezala erregulatzen eta premiazkoa dela lege eta administrazio neurriak hartzea. Azterlan horren arabera, alokairuaren hileko batez bertzeko prezioa 541,6 eurokoa da, baina azterketak berak onartzen du datu horrek ez duela islatzen alokairuko etxebizitza bat eskuratzeko prezio erreala, etxebizitza librearen prezioa askoz ere garestiagoa baita.

Gernikako Ospitalean erizainen eta erizaintzako laguntzaileak falta direla eta egoera kritikoa dela salatu dugu

Larrialdietako paziente kritikoei arreta ematean, triajean eta boxetan dauden pazienteen segurtasuna arriskuan jartzen da.

Eskola garraioaren hitzarmena desblokea dezatela exijitzeko mobilizazioa egin dugu

Kolektibitateen sektoreko patronalaren enpresetako bat den Eulenen aurrean izan da elkarretaratzea, Eusko Jaurlaritzako Hezkuntza Sailaren mendeko ikastetxeetako eskola-garraioko eta jolastokiko zaintzaileen hitzarmen kolektiboaren negoziazioaren blokeoa salatzeko.