Borroka sindikalari esker eta hortik sorturiko presio sozialari esker, joan-etorrietan gurpil-aulki bat erabiltzen duen garbitzailearen enpresak gaur arratsaldean jakinarazi dio langileari ez duela bere lanpostura joan behar –Iruñeko Mendigoiti eskolan 17:00etan egin behar zuen–, bere osasun zaintzako zerbitzuak gaitasun-txostena eman arte. LAB sindikatuatik langile honen osasunaren eta osotasun fisikoaren aldeko borrokaren lehen bataila irabazi izana ospatzen dugu. Hala ere, gogorarazten dugu une honetan bertze garbitzaile bat lanean ari dela, nahiz eta ibiltzeko eskorga bat behar izaten duen.
Zaintzen izeneko garbiketa enpresak SMS bat bidali dio gaur arratsaldean Maria Elena Escudero bere enplegatuari, eta bertan jakinarazi dio bere osasun-zaintzako zerbitzuak ez diela oraindik “gaitasun-txostena” eman; beraz, haiek ezin dutela “lanpostua adierazitako mugetara egokitzeko dokumentua” idatzi eta, ondorioz, “bere lanpostura zerbitzu ematera joatetik salbuetsita” gelditzen dela. Mezuaren arabera, txosten hori jasotzen dutenean langilearekin harremanetan jarriko dira, lanpostua egokitzeko.
LAB sindikatutik atzo salatu genuen bezala, Escudero –56 urtekoa, % 49ko ezintasun aitortuarekin, eta Osasunbideak eginiko txosten baten arabera, gurpil-aulkia behar duena 10-15 minutu baino gehiagoko joan-etorrietarako– gaur itzuli behar zen ikastetxe bateko garbitzaile lanpostura, Gizarte Segurantzak ezintasun iraunkorra ukatu ziolako, baina gaitasun-txostena eta lanpostua egokitzeko agiria falta zituen arren. Antza denez, LABek eginiko ekintza sindikalak, eta hortik sortutako presio sozialak, hainbat paper falta zitzaizkiela gogorarazi die enpresako arduradunei.
Imanol Karrera LABeko bozeramaileak nabarmendu duenez, gaurkoak “lehen bataila irabazi izana” suposatzen du, garbiketako bi langileren osasuna eta osotasun fisikoa bermatzeko borrokan. “Uste dugu atzo sindikatuak eginiko salaketari eta salaketa horrek Nafarroako gizartean sortu duen elkartasun, babes eta presio sozialari esker lortutako garaipena dela. Gure ustez, argi dago Gizarte Segurantzaren eta enpresen jarrera horren atzean motibazio erabat ekonomizista dagoela, langileen osasunerako eskubideak urratu nahi dituena. Horrela bakarrik uler daiteke atzo enpresaren aldetik ezinezkoa zena gaur posible izatea”.