Bilbo Bizkaia Ur Partzuergoko azpikontratetako langileen errealitatea larria da. Jarduera berbera aurrera daramaten langileei gutxienez zeharo baldintza desberdinak dituzten hiru lan hitzarmen ezberdinen aplikatzen zaizkie: Bizkaiko Eraikuntza, Bizkaiko Metalgintza eta Ur Zikloaren Hitzarmen estatala. Sektorean badago laugarren araudi bat: partzuergoko langile publikoei aplikatzen zaien enpresa-hitzarmena. Zer esanik ez, erraldoia da azpikontratetako langileek, lan berbera eginda edo partzuergoarentzako egiturazkoa den funtzio bat beteta, baldintzetan duten arrakala.
Hori dela eta, azpikontrata askok enpresako lan hitzarmenak edo akordioak dituzte, hutsune hori nolabait betetzeko. Une honetan, enpresa akordio asko indargabe daude, eta plantillak, baldintzak eguneratzeko borrokan.
Horregatik, LAB Bilbo Bizkaia Ur Partzuergoarentzat lan egiten duten EUTetako (Edateko Uren Tratamendurako estazioak), HUA (Hondakin-Uren Araztegiak) eta SAREETAKO langileak antolatzen eta saretzen hasi da, euren errealitateari erantzuten dieten lan baldintzak zeintzuk izan beharko liratekeen kolektiboki hausnartzeko eta borrokatzeko.
Momentuz hausnarketa hauek azpikontrata bakoitzaren negoziazioan lurreratuko badituzte ere, gaur, maiatzak 13, sektoreko errealitatea publiko egiteko elkarretaratzea egin dute Ur Partzuergoko bulegoen atarian.
Acciona, Sacyr, Fcc Aqualia, Gestagua, Inaraqua, Cadagua enpresek, beste askoren artean, prekarizatu egiten dituztela azpimarratu dute langileek. Hitzarmenen negoziazioak blokeatzearen, azpikontraten arteko arrakaletan sakontzearen edota hitzarmen estatalak aplikatzearen errudunak dira. Haiek irabaziak dituzten bitartean, langileen errealitatea oso gordina da: hilabete amaierara heltzeko ezintasunak, errespetatzen ez diren atseden orduak, egiturazko lan ordu izan beharko liratekeen aparteko orduak, ordaintzen ez diren guardiak eta abar luze bat.
Enpresen diru-goseaz gain, Bilbo Bizkaia Ur Partzuergoa seinalatu dute gaur. Izan ere, partzuergoa da egoera prekario eta desorekatu honen erantzulea. Ur Partzuergoa da zerbitzu publiko honen atal batzuk azpikontratatzen dituena, ez merkeagoa delako, langileen kudeaketa gainetik kentzeko baizik. Azpikontratazioa administrazioarentzako ekonomikoki garestiagoa da, eta diru aldea enpresa pribatuen eskuetara doa. Aipatutako enpresen izenak begiratu besterik ez dago gehienak azpikontratazioari esker poltsikoak bete dituzten kate erraldoiak direla ikusteko.
LABek partzuergoari bilera eskariak egin dizkio gatazketan esku har dezan, baina hark ez du erantzunik eman, eta beste alde batera begiratzen jarraitzen du. Bien bitartean, azpikontratatutako enpresek partzuergoa bera jartzen dute negoziazio mahaietan baldintza hobeak ez emateko aitzakia gisa: “bezeroa ez dago prest”.
Langileen aldarrikapenak argiak izan dira:
- Epe laburrean kontraten akordioak duinki ixteko konpromisoa: lote ezberdinen arteko arrakala txikitu, erosahalmena bermatu eta bestelako hobekuntza laboralak jasoz: bajen osagarria hobetzea eta ordaindutako lizentzien hobetzea, beste askoren artean.
- Epe ertainerako konponbide kolektiboak bilatzeko ordezkaritza sindikalarekin bildu daitezela.
- Epe luzean publifikazio plana aurkeztu dezatela.
Langileek adierazi dute hau guztia aurrera eramateko Ur Partzuergoak jarreraz aldatu behar duela. Orain arte beste alde batera begira egon dira, eta egoerak inplikazioa eta konpromisoa behar du. Haiek dira azpikontratatutako zerbitzuaren eta, beraz, hau eskaintzen ari diren langileen azken erantzuleak.
Gaur elkarretaratzera bertaratutakoek antolatzen jarraitzeko eta borrokarako deia egin diete gainontzeko azpikontratetako langileei.