Atzo, Bilboko Arte Ederren Museoan, Manpower Group Solutions enpresarekin azpikontratatu diren langileek amaiera eman zioten 42 egunetako grebaldiari. Lortutako akordioak langileen lan baldintzak duintzen ditu. Langile hauen borroka eredugarria izan da, hamaika urte eman dituzte euren eskubideak aldarrikatzen, baina haien eskariei beti axolagabekeriaz erantzun izan diete.
2019. urtera arte soldata hobekuntza progresiboak ematea, subrogazioa hurrengo lizitazio pleguan sartzea eta lan baldintzak duinak izatea lortu dute, alegia, edozein lanpostutan eman beharko liratezkeen baldintzak, baina tamalez, aldarrikapen horiei eutsi behar izan diete protesta bidez, langileon eskubideak bete daitezen.
Beste behin arrazoiaren indarrak gainditu ditu oztopoak, nahiz eta enpresa-azpikontratatuek eta horiek lizitatzen dituztenek erabateko inpunitatez diharduten, eta zerbitzuak lizitatzen dituztenen isiltasuna duten lagun, izan instituzio publikoak edota erakunde pribatuak, aferak haiekin zerikusirik ez balu bezala, arazoei entzungor eginez, eta konplize bilakatuz.
Gaur, esan dezakegu, langileriaren borroka, beti lez, emankor izan dela.
Bilboko Arte Ederretako Museoan azpikontratatutako langileak zoriondu nahi ditugu, etengabeko borroka egin dutelako. Berriro agerian geratu da langile batasuna ezinbesteko tresna dela injustiziaren aurka borrokatzeko.