2024-04-25
HomeEkintza SindikalaBi orduko lanuzteak deitu ditugu otsailaren 27an, martxoaren 12an eta 26an,  8:00etatik...

Bi orduko lanuzteak deitu ditugu otsailaren 27an, martxoaren 12an eta 26an,  8:00etatik 10:00etara, Nafarroako zahar egoitzen sektore osoan

Hiru urte daramatzagu borrokan Nafarroako zahar egoitzen sektoreko lan- eta bizi-baldintzak hobetuko dituen lehen hitzarmen sektoriala lortzeko. Baina ez Nafarroako Gobernuak, ez patronalek, ez dute benetako negoziazio bat aktibatzeko prestasunik, eta ez dute negoziazio-mahai berririk deitu.

Negoziazio hau desblokeatzea premiazkoa eta beharrezkoa da sektoreko langileentzat, eta horixe da LAB sindikatuak azken hilabeteotan eskatu duena. Mobilizazioak, okupazioak eta desobedientzia ekintzak egin ditugu, eta uste dugu une egokia dela beste pauso bat emateko eta sektorean bi orduko lanuzteak deitu ditugu, eta ez dugu baztertzen etorkizunean grebak deitzea.


LABek Nafarroako zahar egoitzen lehen hitzarmen kolektiboaren negoziazio-mahairako deialdia egiteko data bat exijitzen du. Sektoreko langileen egoera kontuan hartuko duen eta sektoreko prekaritatea behingoz irauliko duten edukiak mahai gainean jarriko dituen benetako negoziazioa eskatzen dugu.

Zuzenean eskatzen diegu Nafarroako Gobernuari, hitzarmenaren edukiak desblokeatzeko giltza den heinean, eta patronalei  sektorearentzat ezinbestekoak diren gaiak kontuan har ditzatela eta ahalik eta lasterren deitu dezatela benetako edukiak izango dituen negoziazio-mahai batera.

Zahar egoitzetako langile guztiak beren lantokietan mobilizatzera animatzen ditugu, otsailaren 27an, martxoaren 12an eta 26an bi orduko lanuzteak egin ditzaten. Elkarrekin indartsuagoak gara. Nafarroako  zahar  egoitzen lehen lan hitzarmena lortu arte borrokan jarraituko dugu.

AZKEN ALBISTEAK | ÚLTIMAS NOTICIAS

Euskara baztertzailetzat jo eta hizkuntzaren normalizazio prozesua kolpatzen duen enegarren epaia

Euskal administrazioa euskalduntzeko prozesuaren aurka pairatzen ari garen oldarraldiaren barruko epai berri bat ezagutu dugu. Kasu honetan, Donostiako Administrazioarekiko Auzien Epaitegiak Eibarko udaltzain lanpostu baterako euskara-eskakizuna frogatu beharretik salbuetsi ditu hautagaiak ezohiko egonkortze deialdi batean, hautagaietako batek jarritako helegitea partzialki onartuta.

Lan osasuna bermatzeko prebentzioa jorratzea premiazkoa dela aldarrikatu dugu sindikatuok

Gaur, Laneko Segurtasun eta Osasunaren Nazioarteko Egunaren bezperetan gauden honetan, LAB, ESK, STEILAS, EHNE-Etxalde, HIRU eta CGT (Nafarroan) sindikatuok osatzen dugun intersindikalak irmoki salatu dugu langileok gure osasuna jokoan ipintzen dugula, bizitza duin baterako diru sarrera nahikorik bermatzen ez duten enpleguetan.

Nafarroako Arartekoak Hezkuntzari gomendatu dio Lanbide Heziketan diharduten PTak ere “saritu” ditzala

LABek eskatuta, Patxi Verak zuzentzen duen erakundeak Hezkuntzari eskatu dio beharrezko neurriak har ditzala Lanbide Heziketako PTei ere aplikatzeko DBHra atxikita daudenek jasotzen duten soldataren %5,45eko osagarria.