Urte luzez, Bizkaiko kiroldegi eta kirol zelaietako langileak, borroka eredugarri batean murgilduak egon dira. Borroka horrek, patronala, baloratzeko moduko proposamen bat egitera eraman du. Eta horrela egin zuen urtarrilaren 17an. Beste behin ere, langile borroka eraginkorra dela frogatuta gelditu da.

Orain, patronalaren proposamena nahikoa den edo borrokan jarraitu behar duten erabakitzea dagokie langileei. Honaino langileon indarrak ekarri dituela kontutan harturik, sektoreko langileek denen artean erabaki behar dute hemendik aurrera zer egin.

LABek bere esku dauden tresnak eskainiko dizkie kiroldegi eta kirol zelaietako langileoi erabaki hori, gehiengoaren iritzia jasoz hartzeko. Horretarako, datorren asteko grebak behin behinekoz bertan behera utzi eta zentroz zentro bozkatzeko proposamena luzatu du. Astelehenean, zentsoak kontrastatu ostean, publiko egingo dugu asteazken eta ostegunean gauzatuko diren bozketa toki eta orduak.

LAB, langileon hitza errespetatzeko prest dago. Are gehiago, erabaki hori modu garden eta irekian gauzatu dadin, sektoreko gehiengoaren parte hartzea bermatzeko bozka sistema parte-hartzaile baten aldeko apustua egiten du.

Kiroldegi eta kirol zelaietako langileak deitzen ditugu hautetsontzietara hurbildu eta euren lan baldintzen inguruko erabakia har dezaten.