Gaztetxo Eskolak 20 langile baino gehiago legez kanpo kaleratu dituela salatu du LABek. Sindikatuak langileen subrogazioa, iruzurren amaiera eta kalte-ordainak eskatzen dizkio Gaztetxo Eskolari zein BBKri.
Busturiako BBK Klimak udako denboraldiko udalekuetarako aurten kontratatu duen Gaztetxo Eskola enpresak —orain arte Ortzadarrek eman du zerbitzua—, 20 langile baino gehiago kaleratu dituela salatu du azken asteetan LABek, eta, gaur, kaleratutako langile horiek kanpaldia hasi dute, haien egoera salatu eta subrogazioa eskatzeko.
Zerbitzua Gaztetxo Eskolaren esku geratu bezain laster, LABek ohartarazi zuen subrogazio-prozesua modu desegokian gauzatzen ari zela. Izan ere, azken urteetan udalekuetan lanean aritu diren langileei ez zaie subrogazioa aitortu, eta, horren ordez, ustezko formakuntza batera deitu zituzten. Bertan, presio bidez kaleratzeak sinatzera behartu nahi izan zituzten, mehatxuak barne. Langileek, ordea, antolatzeko eta borrokatzeko erabakia hartu dute, eta LABek iruzur horri aurre egiteko bide sindikala eta judiziala aktibatu ditu.
Sindikatuak azken asteotan mobilizazioak egin ditu, salaketa publikoa zabaldu du, eta hainbat eragilerekin harremanetan jarri da egoeraren berri emateko. Aldi berean, auzi judiziala ere martxan dago, eta datorren astelehenean epaiketa egingo da.
LABek honako hauek exijitzen ditu: kaleratutako langile guztien subrogazioa, iruzurren amaiera, eta Gaztetxo Eskolak zein BBKk langileei dagozkien kalte-ordainak ordaintzea. Arduradunen artean BBK eta Bizkaiko Foru Aldundia ere aipatu ditu LABek, lan eskubideen urraketa hori haien babes instituzionalik gabe ezinezkoa izango litzatekeelakoan.
Zoritxarrez, egoera hau ez da salbuespena: udalekuetan ohikoa bilakatzen ari da administrazio publikoaren diru-laguntzak jasotzen dituzten enpresek lan eskubideak urratzea, lan-hitzarmenak bete gabe eta esplotazioa normalizatuz, administrazioak ezikusiarena egiten duen bitartean.
Horregatik, LABek dei egiten die udalekuetan lan egiten duten gazteei euren lan eskubideen alde antolatzeko eta borrokatzeko, egoera hau errotik aldatzeko.