ARGAZKIA: Eusko Legebiltzarra/Parlamento Vasco


Babes sozialerako euskal sistema publikoaren aldeko kanpainaren baitan, Eusko Legebiltzarreko Lan eta Justizia Batzordean izan dira Bea Martxueta, Joxean Urkiola eta Ohian Ostolaza, LABeko Batzorde Sozioekonomikoko kideak. Bertan,“kapitalak inposatu nahi duen ereduari aurre egiteko modu bakarra babes sozialerako sistema propioren alde egitea” dela azaldu du Martxuetak.

“Euskal Herrian eskubide ekonomiko eta sozialak etengabe urratzen” direla salatu du Batzorde Soziekonomikoko kideak. Eta zehaztu du langileria zigortzea eta pobretzea dakarten hiru politika nagusi daudela eskubide urraketa honen atzean: euskal enpresetan lan-erreformak aplikatzea, emakumeak diskriminatzea eta babes-sistema eraistea. Hauen ondorioz, geroz eta gehiago dira pobrezia egoeran dauden pertsonak, ongizate maila bati eusteko adina baliabide ekonomikorik ez daukatenak.

LABek baditu alternatibak pobrezia eta bizimodu prekarioari aurre egiteko: babes sozialerako sistema propioa. Eta pentsio-sistema publiko bat litzateke sistema horren abiapuntua, pentsioak bermatu eta bizi-baldintza duinak eta autonomoak izateko moduko pentsioak eskainiko dituena.

Martxuetaren esanetan, babes sozialeko euskal sistema publikoak oinarri zehatz batzuk izan behar ditu, besteak beste,“kalitatezko enplegua sortzeko politika erreal eta eraginkorra egitea, lan-denborak murrizteko eta banatzeko politikak sortzea, laneko bizitza eta bizitza soziala bateragarri egiteko benetako politikak aplikatzea, gizarte-zerbitzu publikoak garatzea pertsonen bizi-baldintzak hobetzeko eta kalitatezko enplegu publikoa sortzeko eta pentsioetara bideratutako gastu publikoa nabarmen handitzea”.

Jendarteak pairatzen duen pobreziaren atzean politika jakin batzuk dauden heinean, egoera hau iraultzeko bestelako politika batzuk ezartzea beste biderik ez da. Aipatu neurriak aplikatuz soilik lortuko da bizitza duina bermatzea pertsona ororentzat. Diskurtsoak alde batera utzi eta pobrezia gainditzea ahalbidetuko duten neurriak hartzeko unea da, eta erakundeek zeregin handia dute norabide horretan.