PCB-ITPn, 83 langile beren lanpostuetara itzuliko dira. Espainiako Auzitegi Gorenak deuseztzat jo du ITP-PCBren kaleratze kolektiboa, ezetsi egin du enpresak aurkeztutako errekurtsoa, eta kaleratutako 83 langileak berriz onartzera kondenatu ditu. Auzitegi Gorenaren epaiak berretsi egiten du eta hasieratik esan genuenari arrazoia ematen dio. PCBn ez dago inor soberan.
LABen argi daukagu epai hau borrokaren emaitza dela. 2020ko azaroan PCBko Zuzendaritzak langile horiek kaleratzea planteatu zuenean, langileek ulertu zuten hori saihesteko bidea borroka zela.
Borroka horrek enpresaren harresiak gainditu zituen, Ezkerraldeko eskualde osoan aktibatu zen borroka. Gazte mugimendua, pentsiodunen mugimendua, mugimendu feminista, gizarte erakundeak, denak Ezkerraldearen etorkizunaren alde borrokatzen, erakundeek ahaztutako eta etengabeko desindustrializazio prozesu batek zigortutako eskualdea, Euskal Herriko langabezia tasarik altuenetakoak dituena.
Helburu bera zuten beste langile batzuekin batera egindako borroka izan zen: lanpostuak, lan-baldintzak eta Euskal Herriko etorkizun industriala defendatzea. PCB-ITPko langileek, Aernnova, Alestis, Tubacex eta Petronorreko langileekin batera, Ezkerraldea, Aiaraldea eta Gasteiz kaleak zeharkatu zituena.
PCB-ITPko zuzendaritzaren neurrigabeko nagusitasun eta zikoizkeriaren aurrean, eta erakundeek, bereziki Eusko Jaurlaritzak, erabateko utzikeriaren aurrean, sindikatu, gizarte eta, azken batean, langile klasearen aliantzek erakutsi dute zein den lanpostuak, lan-baldintza duinak eta, ondorioz, Euskal Herrian bizimodu duina defendatzeko bidea eta alternatiba.
LABen argi daukagu hori dela bide bakarra eta horregatik lanean jarraituko dugu norabide horretan langileen eskubideak erasotzea erabakitzen duen Euskal Herriko edozein enpresatan. Auzitegi Gorenaren epaia borrokaren azken maila baino ez da izan. Zorionak PCBeko langileak, Zorionak Ezkerraldea!