APDEMA eta INDESAko enpresa-batzordeek eta Arabako egoitza eta etxebizitza komunitarioen eta esku-hartze sozialeko langileek mobilizazioa egin dute gaur Foru Aldundiaren egoitzaren aurrean. Salatu dute foru erakundearen aurrekontuak ez direla nahikoak eta ez dakartela hobekuntzarik azpikontratatutako, feminizatutako eta prekarizatutako gizarte-zerbitzuetako langileentzat.
Aurrekontu horien bidez, Aldundiak oztopatu egiten du benetako negoziazio kolektibo errealaren aukera, hobekuntza ekonomiko eta sozialak Foru Gobernuak berak negoziazio-mahaietatik kanpo hartzen dituen erabakietara baldintzatuz. Aldundiak ez du parte hartzen negoziazio mahaietan baina blokeatu egiten ditu finantzazio faltarekin.
“Aro berri bat dator. Aurrekontu inbertitzaileenak dira, pertsonentzat gehien erabiltzen direnak, beraz, Araban etapa berri bat ireki dute, ilusio aro bat”, adierazi zuen Ramiro González Arabako ahaldun nagusiak foru erakundearen aurrekontuen aurkezpenean. “Izan ere, diru-bilketaren hazkundeari, Europako finantzaketari eta defizitari esker, kontu handinahiak eta ilusionagarriak izango ditugu”, gaineratu zuen. Hori da herritarrei komunikabideetan agertzen zaien errealitatea, baina aurrekontuak eragiten dien langileen errealitatea oso bestelakoa da.
Enpresa pribatuek Foru Aldundiarekin, Eusko Jaurlaritzarekin eta Gasteizko Udalarekin egindako kontratuen edo lankidetza-hitzarmenen bidez kudeatutako baliabide publikoez ari gara. Osasun-krisiaren ondorioak gehien pairatu dituzten baliabideak dira, eta ez dira gelditu. Publikoki aitortu zaie egindako lana, baita txaloekin ere. Pandemian funtsezkoak izan dira, ezinbestekoak, baina orain ikusezinak dira. Sektoreko langileak nazkatuta daude egoera honekin eta erakundeen tratu txarrarekin.